Qazaqstandyq oqýshysy estý qabileti nashar adamdarǵa arnalǵan mobıldi qosymsha oılap tapty

NUR-SULTAN. QazAqparat – Elordalyq 11 synyp oqýshysy Haqnazar Ábilda estý qabileti nashar adamdarǵa arnalǵan dybysty mátindeý fýnktsııasy bar mobıldi qosymshany oıap shyǵardy, dep habarlaıdy QazAqparat Nur-Sultandaǵy Halyqaralyq mekteptiń baspasóz qyzmetine silteme jasap habarlaıdy.

Python baǵdarlamalaý tilindegi qosymsha sýrettegi/fotodaǵy jazýdy jáne daýysty mátinge aınaldyrady. Oqýshynyń aıtýynsha, vırtýaldy assıstent jáne mátindi tanýǵa arnalǵan skaner qulaǵy kemis adamdardyń ómirin jeńildetip qana qoımaı, smartfon qoldanýshylarynyń kúndelikti ómirinde de septigin tıgizedi.

«Meniń oıymsha, usynylǵan joba qoǵam úshin paıdaly bolmaq: múmkindigi shekteýli adamdar úshin de, qarapaıym paıdalanýshylarǵa da. Olar mátindi qolmen terip otyrmaı, ony jaı ǵana dybystasa bolǵany. Sondaı-aq, mobıldi qosymshada mátindi sol ýaqytta aýdarý fýnktsııasy qarastyrylǵan. Vırtýaldy assıstent barlyǵy 20 shaqty fýnktsııany oryndaıdy», - deıdi Haqnazar Ábilda.

Oqýshynyń jumysy Qazaqstan Táýelsizdiginiń 30 jyldyǵyna arnalǵan NIS oqýshylar arasyndaǵy «Týǵan elge taǵzym» jelilik baıqaýynda joǵary baǵalanǵanyn aıta ketý qajet. Ol 21 mektepten kelgen 46 úzdik jumystyń ishinde top jardy.

Jas novatordyń aıtýynsha, bolashaqta ol qosymshany Play Market jáne App Store platformalarynda iske qosýdy jáne zaǵıp adamdarǵa arnalǵan fýnktsııalardy qosýdy josparlap otyr.

Dúnıejúzilik densaýlyq saqtaý uıymynyń málimetinshe, álemde adamdardyń 5%-nan astamy estý qabiletinen zardap shegedi. Al, elimizde olardyń sany 150 myńǵa jýyq.