Qazaqstandyq oqýshylarǵa úı tapsyrmasy qysqartylady
ASTANA. QazAqparat - QR Bilim jáne ǵylym mınıstri Erlan Saǵadıev oqýshylardyń úı tapsyrmalaryn qysqartýdy josparlap otyr. Bul týraly ol búgin Úkimet otyrysynan keıin málim etti, dep habarlaıdy QazAqparat.
«Biz elektrondy kúndelikti, elektrondy oqýlyqty qurýǵa, sondaı-aq eń bastysy - mektep dálizderinde oqýshylar úshin jeke shkaftardy ornatýǵa nıettimiz. Sonymen qatar bizde úı tapsyrmalary boıynsha shekteý bolady. Búgin nemese erteń tıisti habarlama jarııalanady. Osy oraıda eki toptan quralǵan mektep dırektorlary, ádiskerler úı tapsyrmasynyń kólemine qatysty jumystarymen aınalysqan edi. Úı tapsyrmasyn shamamen 40 mınýt - 1 saǵatqa qysqartý týraly usynys bar»,-dedi mınıstr.
Munymen qosa ol keıbir pánder boıynsha úı tapsyrmasy berilmeýi múmkin ekenin jetkizdi.
Budan buryn habarlanǵandaı, Úkimet otyrysynda Saǵadıev árbir synypta Wi-Fi ornatylatynyn, sondaı-aq ár oqýshynyń jeke shkafy bolatynyn málim etken edi.
