Qazaqstandyq oqýshylardyń jylqy kóńinen qaǵaz alý jobasy halyqaralyq baıqaýda júldege ilikti

ORAL. QazAqparat – Oral qalasyndaǵy Nazarbaev zııatkerlik mektebiniń oqýshylary Adııa Aǵedilova men Ásem Amangeldına INSPO halyqaralyq ǵylymı jobalar konkýrsynda úshinshi orynǵa ıe boldy, dep habarlaıdy QazAqparat tilshisi.

Nazarbaev zııatkerlik mektebiniń baspasóz qyzmeti málim etkenindeı, atalmysh jarysty 2007 jyldan beri Túrkııa uıymdastyryp keledi.

Oraldyq jas zertteýshiler tabıǵı qordy saqtaý, qaldyqty qaıta óńdeý maqsatynda jylqy kóńinen qaǵaz alý jolyn usyndy.

Jylqy kóńiniń negizinen aǵash quramynda kezdesetin tsellıýlozadan turatyny belgili. Baǵaly jáne suranysqa ıe materıaldardy sıntezdeý úshin tek qana janýardyń qaldyǵy, qajetti aǵash massasyn bólip alý úshin birneshe hımııalyq zat qana kerek eken.

Avtorlardyń aıtýynsha, qala turǵyndary arasynda saýalnama júrgizilip, jobanyń teorııalyq jáne eksperımenttik baǵyty taldanǵan.

Zertteý jumysy qazylar alqasy músheleriniń úlken qyzyǵýshylyǵyn týdyrdy, óıtkeni bul joba oqýshylardyń ekologııalyq jáne ekonomıkalyq saýattylyǵymen baılanysty, qaǵaz jasaý tehnologııasy, onyń orman qoryna áseri, balamaly shıkizatty qoldaný múmkindigi jáne qaǵazdy únemdeý máseleleri týraly bilimdi biriktiredi. Osyǵan oraı baıqaýdyń qazylar alqasy Adııa men Ásemge arnaıy syılyq – MILSET halyqaralyq is-sharasyna shaqyrý berdi.

-Qaǵaz úlgilerin alýda mehanıkalyq ádister qoldanyldy, sondyqtan arnaıy qaǵazdy bastyrý quraldary men jelim, qospanyń kómegimen sapasyn áli de jaqsartýǵa bolady. Al myna úlginiń sapasy maılyq pen dárethana qaǵazdary sıpattamalary boıynsha qanaǵattanarlyq, – deıdi Adııa.

Ǵylymı jobanyń nátıjeleri men qorytyndysy negizinde oqýshylar qaǵazdy alý tehnologııasy, onyń aǵash resýrstaryna áseri, balama shıkizatty qoldaný múkindikteri, qaǵazdy únemdeý máseleleri týraly oqýshylardyń ekologııalyq, ekonomıkalyq saýattylyǵyn arttyrý maqsatynda mektepterde synyptan tys sharalardy jıi ótkizýdi usynady.

Aldaǵy ýaqytta jylqy kóńinen qaǵazdy alý kezeńderinde tolyqtyrǵyshtar, jelimder arqyly onyń qasıetterin jaqsartý, jyrtylýǵa tózimdiligi, zoldigi, ylǵaldy ortada isinýi (gıdrokeńeıýi), optıkalyq qasıetterin standartty synamalar arqyly tekserý kózdelýde. Sonymen qatar jylqy kóńinen alynǵan tsellıýlozany ydyratý arqyly bıogazdy alý jolyn zertteý jáne onyń ekonomıkalyq esebin shyǵarý da keler kúnniń enshisinde. Bul baǵyttaǵy zertteý balamaly energııa kózin alý máselesiniń sheshimin tabýǵa múmkindik beredi, sebebi metan benzınge qaraǵanda, ekologııalyq jaǵynan tıimdi, al sýtekke qaraǵanda, energotıimdiligi úsh ese joǵary jáne tasymaldaǵan kezde qaýipsiz.