Qazaqstandyq oqýshylardyń úzdik jobalaryn kásipkerler qarjylandyrýy múmkin
ASTANA. QazAqparat - Qazaqstandyq mektep oqýshylarynyń úzdik jobalaryn kásipkerler qarjylandyrýy múmkin. Bul týraly búgin Astanada ótken mektep oqýshylary arasyndaǵy ınnovatsııalyq jobalardyń ulttyq olımpıadasyna arnalǵan brıfıngte «Qazaqstan - 2050» jalpyulttyq qozǵalysy» keńesiniń tóraǵasy Muhtar Mankeev málimdedi, dep habarlaıdy QazAqparat.
«Qazaqstan - 2050» jalpyulttyq qozǵalysy búginnen bastap mektep oqýshylary arasynda ulttyq olımpıadanyń bastalǵanyn jarııalap otyr. Ulttyq olımpıadaǵa elimizdiń barlyq mektebiniń 6-11 synyptarynyń oqýshylary qatysa alady. Oqýshylardyń jas erekshelikterin eskere otyryp, úmitkerlerdi 6-8 jáne 9-11 synyptar arasynda eki topqa bólip qatystyrý kózdelgen. Qatysýshylardyń «Jasyl energetıka», «ІT», «Modeldeý jáne robototehnıka», «Turmysqa paıdaly ónertabystar» atty taqyryptyq baǵyttar boıynsha baqtaryn synaýyna múmkindik bar. Olımpıada basty 3 kezeńnen turady. Atap aıtsaq, oqýshylardyń jumysyn qabyldaý, kelip túsken jumystardy sarapshylardyń qaraýyna usyný men qorytyndysyn shyǵarý jáne sońǵy kezeń - marapattaý kezeńi. Qatysýshylar óz jumystaryn olimpiad.kz2050.kz saıtyna joldaı alady. Saıtta jumystardy qabyldaý tártibi men saıtqa ornalastyrý joldary kórsetilgen. Jumystardy saıtqa joldaýdy ýaqyt jaǵynan utymdy ári senimdi ekenin eskerdik. Kelip túsken jumystardyń ishinen 10 joba iriktelip alynady. Bizdiń jobamyzǵa QR Bilim jáne ǵylym mınıstrligi men «Samuryq Qazyna» ál-aýqat qory qoldaý tanytyp otyrǵany úshin alǵys bildirgimiz keledi», - dedi M.Mankeev.
Keńes tóraǵasy bul olımpıadanyń dástúrli olımpıadalardan ereksheligine de toqtalyp ótti.
«Іrikteýden ótken jumystar marapattalyp, odan ári damytý jáne kommertsııalandyrý úshin mentorlarǵa usynylady. Mentorlar joba avtorlaryna aqyl-keńesterin berip, múmkindikterinshe demeýshilik tanytady. Bizdiń olımpıada jeńimpazdary jumystarymen qoǵamǵa, ózine paıdasyn tıgizetin bolady», - dedi M.Mankeev.
Aıta óteıik, qazirgi ýaqytta jumystardy baǵalaýǵa arnalǵan sarapshylar toby qurylǵan. Sarapshylar tobyna oqýshylar óz jumystaryn 2017 jylǵy 15 qazanǵa deıin usyna alady. Túrli baǵyt boıynsha kelip túsken jumystardyń ishinen júldege laıyqtylar irikteledi. Júldege ıe bolǵan 10 jobanyń avtoryna bilim sertıfıkattary berilip, kýbok tapsyrylady.
