Qazaqstandyq oqýshylardyń oqý jetistigin baǵalaý erejeleri ózgerdi - mınıstr

NUR-SULTAN. QazAqparat - Bilim jáne ǵylym mınıstri oqýshylardyń oqý jetistikterin baǵalaý erejelerine ózgerister engizý týraly buıryqqa qol qoıdy. Bul týraly Ashat Aımaǵambetov áleýmettik jelidegi paraqshasyna jarııalady, dep habarlaıdy QazAqparat.

«Osyǵan deıin habarlaǵanymyzdaı, buıryqta «Altyn belgi» tósbelgisin alý talaptary aıtarlyqtaı kúsheıtildi», - degen vedomstvo basshysy mundaı sheshim muǵalimderdiń 2021 jylǵy tamyz keńesinde qabyldanǵanyn eske saldy.

Osylaısha, kelesi jyldan bastap 9-synypty aıaqtap, arnaıy attestat jáne 10-11 synyptardyń barlyq oqý toqsany boıynsha «úzdik» degen baǵa alǵan oqýshylar «Altyn belgi» tósbelgisine úmitker bola alady.

«Sondaı-aq talapkerler NZM bazasynda matematıkadan emtıhan tapsyrýy kerek. Bul shara akademııalyq adaldyqty qamtamasyz etý úshin qabyldanǵanyn túsiný mańyzdy. Bul rette NZM-de emtıhan tapsyratyndarǵa da, jalpy bilim beretin mektep bazasynda tapsyratyndarǵa da tapsyrmalar birdeı bolady.

Byltyr mektep bitirýshiler rekordtyq «Altyn belgi» aldy. Keıbireýleri UBT nátıjesi boıynsha tómen ball aldy. Osyǵan baılanysty úmitkerlerdi úzdik belgisine obektıvti jáne ashyq baǵalaý úshin emtıhandardyń biri táýelsiz bilim berý uıymynda ótedi.

Bıyl mektep bitirýshiler emtıhandy óz mektebinde tapsyrady. Sondaı-aq belgiden bas tartý týraly ótinishter jaramsyz. Talaptarǵa saı keletin úmitkerler belgilengen tártipte qorytyndy attestatsııadan ótedi.

Aıtpaqshy, normalar kelesi jyldan bastap kúshine engenimen, bıyl UBT qorytyndysy boıynsha úzdik belgisin berýdiń obektıvtiligi baǵalanady. Osyǵan baılanysty mektep ákimshiligi, bilim basqarmalary men bólimderi qorytyndy emtıhandarynyń ashyqtyǵy men obektıvtiligin qamtamasyz etýi tıis. Árbir jaǵdaı boıynsha UBT nátıjeleriniń qorytyndylaryna taldaý júrgiziledi», - dep jazdy Ashat Qanatuly.

Buıryqtyń mátini QR Ádilet mınıstrliginde tirkelgennen keıin jarııalanady.