Qazaqstandyq oqýshylardyń ıntellektýaldyq áleýeti jyl saıyn artyp keledi - E. Imanǵalıev
ALMATY. QazAqparat - Qazaqstandyq mektep oqýshylarynyń ıntellektýaldyq áleýeti jyl saıyn artyp keledi. Buǵan halyqaralyq bilim olımpıadalaryndaǵy jetken eleýli jetistikterimiz kýá. Bul týraly búgin Almatyda matematıka, fızıka jáne ınformatıka pánderi boıynsha bastalǵan XI halyqaralyq Jáýtikov olımpıadasynyń ashylý saltanaty barysynda QR Bilim jáne ǵylym vıtse-mınıstri Esenǵazy Imanǵalıev málimdedi.
«Elbasy Nursultan Nazarbaev eldiń ınnovatsııalyq damý úderisine aıryqsha mán berýde. Sondyqtan bul turǵyda elimizde matematıka, fızıka jáne ınformatıka pánderiniń damýyna jiti kóńil bólinip jatyr. Sonyń arqasynda búginde Halyqaralyq Jáýtikov olımpıadasy úlken dárejege kóterildi. Ol osymen 11-shi ret jyl saıyn turaqty túrde bir mezgilde ótkizilip keledi. Byltyr qazastandyq oqýshylar jalpy komandalyq esepte ekinshi orynǵa kóterilgen bolatyn. Bıyl oqýshylarymyzdan odan joǵary nátıje kútemiz», - dedi E. Imanǵalıev.
Aıta ketelik, halyqaralyq Jáýtikov olımpıadasynyń jeńimpazdary, ıaǵnı altyn, kúmis jáne qola medal ıegerleri Ulttyq biryńǵaı testileýge qatyspaıdy. Olar byltyrdan bastap, Nazarbaev ýnıversıteti jáne basqa da otandyq joǵary oqý oryndarynyń birinshi kýrstaryna birden qabyldanýǵa múmkindik alǵan. Mysaly, byltyr osy olımpıadanyń qatysyp júldeli oryndarǵa ıe bolǵan 51 oqýshy Nazarbaev ýnıversıtetine túsken eken.
Taǵy bir aıta ketetin jaıt, halyqaralyq bilim olımpıadalaryna qatysyp júldeli oryndarǵa qol jetkizgen shet eldik oqýshylar da bıyldan bastap Nazarbaev ýnıversıtetine oqýǵa qabyldana alady.
XI halyqaralyq Jáýtikov olımpıadasy 17 qańtarǵa deıin jalǵasady.
