Qazaqstandyq oqýshylardyń bilimdegi jetistigine Halyqaralyq zertteý bastaldy - pm.kz
ASTANA. 2 sáýir. QazAqparat - Qazaqstanda oqýshylardyń bilim jetistiginiń PISA Halyqaralyq (Programme for International Student Assessment) zertteýi bastaldy.
Sáýir aıynda 15 jastaǵy qazaqstandyq bilim alýshylar PISA-2012 halyqaralyq salystyrmaly zertteýine qatysady. Bul týraly pm.kz saıtynda habarlandy.
Qazaqstan Respýblıkasynyń Prezıdenti N.Á.Nazarbaevtyń «Áleýmettik-ekonomıkalyq jańǵyrtý - Qazaqstan damýynyń basty baǵyty» atty halyqqa Joldaýynda 2012-2016 jyldarǵa arnalǵan bilim alýshylardyń fýnktsıonaldyq saýattylyǵyn damytý boıynsha Ulttyq jospardy jasaý júkteldi.
Osy jospar aıasynda qazaqstandyq bilim alýshylardyń bilim jetistikterin táýelsiz baǵalaý monıtorıngine jáne Halyqaralyq salystyrmaly zertteýine qatysýy bul baǵyttaǵy shynaıy qadam.
PISA Halyqaralyq zertteýiniń maqsaty 15 jastaǵy oqýshylardyń matematıkalyq saýattylyǵyn, jaratylystaný men oqýdaǵy saýattylyǵyn baǵalaý bolyp tabylady. Zertteýdiń negizi mekteptiń baǵdarlamasyn meńgerý ǵana emes, jeke tulǵanyń damýyndaǵy bilimin, tanymyn shyńdaý, ártúrli ómirlik jaǵdaılarda sheshim qabyldaı alatyn qabiletterin damytýǵa baǵyttaý.
Zertteý kezinde bilim alýshylardyń bilim jetistigimen qatar, baǵdarlamaǵa qatysatyn elderdiń erekshelikterin anyqtaýǵa múmkindik beretin faktorlar qarastyrylady. Bul jıyntyq suraqtar arqyly oqý-tárbıe úrdisin uıymdastyrýdan bastap, otbasynda balanyń damýyna qajetti jaǵdaı jasaýǵa keshendi baǵa berý bolyp tabylady.
Oqýshylardyń bilim jetistikterin baǵalaý boıynsha PISA Halyqaralyq baǵdarlamasyn (Programme for International Student Assessment) Ekonomıkalyq yntymaqtastyq jáne damý uıymy (OECD - Organisation for Economic Cooperation and Development) úılestiredi. Qazaqstan Respýblıkasy Bilim ǵylym mınıstirligi Ulttyq bilim berý statıstıkasy jáne baǵalaý ortalyǵy zertteýdiń Qazaqstandaǵy Ulttyq úılestirýshisi bolyp tabylady.
PISA-2012 Halyqaralyq zertteýine Qazaqstannnyń 218 bilim berý uıymynyń 5 myńnan astam oqýshysy qatysady.
