Qazaqstandyq oqýshylardyń 5,8% elektrondy temeki shekken

ASTANA. QazAqparat – Qazaqstandyq jasóspirimderdiń 5,8%-y elektrondyq temekini (veıpterdi) jıi qoldanǵan. Bul derekter «Qazaqstan oqýshylarynyń ómir salty faktorlary, olardyń fızıkalyq, psıhıkalyq densaýlyǵy men ál-aýqaty» ulttyq esebinde jarııalandy, dep habarlaıdy QazAqparat tilshisi.

«Balalardyń 5,8%-y sońǵy 30 kúnde veıp tutynǵan. Ásirese 13 jastan 15 jasqa deıingi er balalarda bul kórsetkish eki ese úlken. 2018 jyly júrgizilgen aldyńǵy zertteýmen salystyrǵanda 2022 jyly uldar men qyzdar veıpterdi kóbirek qoldana bastaǵan», - delingen Qazaqstan Dúnıejúzilik Densaýlyq saqtaý uıymymen birlesip júrgizgen zertteý esebinde.

Ómirinde temeki shegip kórgen jasóspirimderdiń úlesi 6% qurady. Balalardy temeki shegýge tartý 2018 jylǵy kórsetkishtermen salystyrǵanda 2022 jyly 1,2%-ǵa ósken.

Aıta keteıik, Qazaqstan oqýshylarynyń 75%-ǵa jýyǵy qos ata-anasymen birge turady. Atalǵan qujatta 11, 13 jáne 15 jastaǵy 7400-den astam mektep oqýshylarynyń aýqymdy derekteri jınaqtalǵan. Esep 2022 jylǵy «Mektep jasyndaǵy balalardyń densaýlyqqa qatysty minez-qulqy» (HBSC) zertteýine negizdelgen.