Qazaqstandyq oqýshylar Úndistandaǵy robototehnıka jarysynda joǵary marapatqa ıe boldy

ASTANA. QazAqparat - Úndistannyń Pýna qalasynda ótken FIRST Tech challenge India Championship 2023 robototehnıka jarysyna qazaqstandyq oqýshylary qatysty, dep habarlaıdy QazAqparat Oqý mınıstrligine silteme jasap.

Eki kúndik jarystyń qorytyndysy boıynsha Almaty qalasyndaǵy №81 mamandandyrylǵan mektep oqýshylary irikteý matchtarynda jeńilissiz óner kórsetip, joǵary úsh marapatqa ıe boldy.

- Finalist Alliance Captain Award - fınaldyq matchtar barysynda Alıansty basqarǵany úshin arnaıy marapat;

- Innovate award - Robot jasaýdaǵy ınnovatsııalyq tásil úshin eń joǵary ınjenerlik marapat;

- Rookie Inspiration - jańadan kelgen komandaǵa beriletin eń joǵary marapat.

«Biz bul sapardan úlken tájirıbe aldyq. Balalar Izraıldiń eń myqty komandasyn jeńip shyqty. Álemdik arenaǵa alǵash ret shyqqan komanda úshin bul úlken jetistik. Qazylar alqasy da balalardyń jumysyn joǵary baǵalap, birden úsh marapat tabystady», – dedi jattyqtyrýshy Bekzat Amanov.

Aıta keteıik, FIRST Tech challenge India Championship 2023 robototehnıka jarysyna 5 elden 70 komanda jınaldy. Qazaqstan, Úndistan, Izraıl, Reseı jáne Rýmynııa memleketteriniń oqýshylary ózara myqtyny anyqtady.