Qazaqstandyq oqýshylar shahmattan álem chempıonatynda eki medal aldy
Kishi topta (12 jasqa deıin) Úndistannan kelgen «Velammal MHS Mogappair» mektep oqýshylary barlyq 8 matchta jeńiske jetip,birinshi oryn ıelendi . Ekinshi oryn Ýkraınanyń «Lviv Academic Gymnasium» komandasyna berildi (Lvov qalasy). Úshinshi orynǵa birden bes komanda úmitker bolsa, onyń tórteýi Qazaqstannan. Qola júldegerler qosymsha kórsetkishter boıynsha anyqtaldy. Nátıjesinde medaldardy Astana qalasynyń Respýblıkalyq fızıka-matematıka mektebinen Alanbek Jaınazarov, Ámir Júkenov, Mıras Hasenov, Aısultan Anetov aldy.
Al úlken topta (18 jasqa deıin) týrnır aıaqtalýǵa bir kún qalǵanda ystanbuldyq «Istanbul ENKA High School» mektebiniń shahmatshylary altyn medalǵa qol jetkizdi.
Qazaqstandyqtar chempıonattyń sońǵy kúnine deıin tek 7-orynǵa ıe bolyp kelse, sońǵy kúni jeńiske degen erekshe erik-jiger kórsetip, nátıjesinde Almatydaǵy Respýblıkalyq fızıka-matematıka mektebi kúmis júlde aldy. Olardyń 7-shi jáne 8-shi týrdaǵy eki jeńisi, komandalyq upaı boıynsha Úndi komandasymen teńesýge, al qosymsha kórsetkishter boıynsha qarsylastarynan basym túsýge yqpal etti. Kúmis júldegerler qatarynda Edgar Mamedov, Imanǵalı Aqylbaı, Ámir Igen, Zarına Nurǵalıeva, Álıhan Dáýlet bar. Qola medal «Velammal Vidyalaya alapakkam» jáne «Chennai» úndi mektebiniń oqýshylaryna buıyrdy.
Mańǵystaý oblysynyń ákimi Nurlan Noǵaev bolashaqta Aqtaýda osyndaı týrnırler jıi ótetinin atap ótti.
Birneshe kúnge sozylǵan halyqaralyq shahmat týrnıri aıaqtaldy. Bul strategııalyq mańyzdy jarysta bizdiń oqýshylar ózderiniń tapqyrlyǵyn, tereń bilimi men kommýnıkatsııa mashyqtary joǵary ekenin kórsetti. Memleket basshysy Qasym-Jomart Toqaev Astanada shahmattan álem chempıonatynyń ashylýynda «Shahmat – bul adam sanasyn shyńdaıtyn sport» degen bolatyn. Bul ıntellektti damytatyn qyzyqty oıyn ǵana emes, sonymen qatar adamnyń oılaýyna oń áser etetin qundy qural ispettes. Osy sport túrimen aınalysa otyryp, bizdiń jasóspirim balalarymyz tapqyrlyǵy men shyǵarmashylyǵyn shyńdaıdy, sondaı-aq óz qataryna úlgi bolady
, - dedi Nurlan Noǵaev.
Jeńimpazdardy marapattaý rásiminde Qazaqstan shahmat federatsııasynyń prezıdenti Tımýr Týrlov barlyq qatysýshylarǵa shahmattyń mańyzdylyǵyn jáne onyń búkil álemde tanymaldylyǵyn atap ótip, tabys tiledi.
Búgin munda álemniń 50-den astam elinen ondaǵan komanda jınaldy. Bul búkil álemdegi shahmat qozǵalysynyń keremet tanymaldylyǵyn jáne Qazaqstannyń álemdik shahmatqa áser ete alatynyn kórsetti. Týrnır júzdegen jas shahmatshynyń mansabyna negiz salǵanyna senimdimin. Sondaı-aq munda olar jańa dostar men pikirlester taýyp qana qoımaı, Aqtaýdyń sulýlyǵynan lázzat alyp, qazaq mádenıetin jaqynyraq tanı túskenine kúmánim joq
, - dedi Tımýr Týrlov.
Chempıonattyń jabylý saltanaty Kaspıı teńiziniń jaǵalaýyndaǵy amfıteatrda ótip, otshashýmen aıaqtaldy.
Esterińizge sala keteıik, chempıonat 4-7 tamyz aralyǵynda ótti. Oǵan álemniń 53 elinen 400-den astam oqýshy qatysty.
