Qazaqstandyq oqýshylar ózderiniń bıznes jobalaryna ınvestıtsııa tarta alady
Bıznes-ınkýbatorǵa qatysý úshin 200 adam tirkeldi, onyń 70-i oqytýǵa iriktelip alynǵan, al fınaldyq kezeńge 37 oqýshy jetken.
«Bıznes-ınkýbator fınalısteri – Express Pharmacy dońǵalaqty dárihanasy, Gradu8 mektep kıimi brendi, zergerlik buıymdar onlaın-dúkeni, Shine arnaıy fotostýdııasy, jeke kondıterlik dúken, Dala School jasóspirimderdi damytýǵa arnalǵan mektebi, Gulde jylyjaılardy avtomattandyrý jobasy elimizdiń eń basty startap-alańy - Astana Hub tehnoparkinde óz jobalaryn tanystyrdy. Fınalıster ózderiniń shaǵyn bıznesin iske qosý men testileý úshin 50 myń teńge aldy. «Halyq» qaıyrymdylyq qory Ozgeris bıznes-ınkýbatory qatysýshylaryna jalpy somasy 2 mln teńgege qarjylaı qoldaý kórsetti.
«Halyq» qory bıznes-ınkýbatordyń bastamasyn úlken qýanyshpen qoldaıdy, onda árbir jasóspirim óz ıdeıalaryn júzege asyrýǵa múmkindik alady, qurdastary men tájirıbeli mentorlardyń qoldaýyna ıe bolady jáne óziniń alǵashqy ónimderi men kásibin jasaıdy. Biz oqýshylarǵa sáttilik tileımiz jáne olardyń ata-analary men muǵalimderine kásipkerlik jolynda kórsetken kómegi úshin alǵys bildiremiz. Bolashaqta da mektep jobalaryn árdaıym qoldaımyz», – delingen qor úndeýinde.
Bıznes-ınkýbatorǵa kelesi qabyldaý 2021 jyldyń aqpan aıynda ótedi, oǵan 1000 adamdy tirkeý josparlanyp otyr. Qazaqstan boıynsha 15-18 jas aralyǵyndaǵy joǵary synyp oqýshylary men kolledj stýdentteri jobaǵa tegin qatysa alady. Ótinish berý úshin atameken.co saıtyndaǵy «Ozgeris» kýrsyn qaraý kerek. Ásirese qatysýshynyń ıdeıasy men bıznes-jobasynyń bastapqy ázirlemesi artyqshylyqqa ıe bolady.
Baǵdarlamaǵa qatysý úshin ekinshi lekke ótinimder 2021 jyldyń 1 aqpanyna deıin saıtta qabyldanady. Oqytý Atameken Academy platformasynda onlaın ótedi.
