Qazaqstandyq oqýshylar matematıkadan halyqaralyq olımpıadada 6 medal jeńip aldy

ASTANA. QazAqparat – Japonııanyń Tıba qalasynda ótken 64-shi halyqaralyq matematıkalyq olımpıadada (IMO-2023) qazaqstandyq oqýshylar birden alty medalǵa ıe boldy. Oǵan álemniń 112 elinen barlyǵy 618 oqýshy qatysty, dep habarlaıdy QazAqparat.

Oqý-aǵartý mınıstrliginiń málimeti boıynsha, Qazaqstan quramasy eki kúmis jáne tórt qola medal jeńip alyp, álemdik esepte 21-orynǵa ıe boldy:

II oryn – Mıron ıÝrkevıch – Almaty qalasyndaǵy respýblıkalyq fızıka-matematıka mektebiniń 10 synyp oqýshysy;

II oryn – Raıymbek Baıshýaq – Almaty qalasyndaǵy respýblıkalyq fızıka-matematıka mektebiniń 11 synyp oqýshysy;

III oryn – Jan Daýtov - Qostanaı oblystyq «Bilim-ınnovatsııa» lıtseı-ınternatynyń 10 synyp oqýshysy;

III oryn – Batyrhan Sakenov – Almaty qalasyndaǵy Haileybury Almaty halyqaralyq mektebiniń 12 synyp oqýshysy;

III oryn – Vladımır Rogovskıı – Pavlodar qalasynyń №8 mektep-lıtseıiniń 10 synyp oqýshysy;

III oryn – Marǵulan Sharel – Jambyl oblystyq «Bilim-ınnovatsııa» lıtseı- ınternatynyń 10 synyp oqýshysy.

«Bizdiń ulttyq quramanyń matematıka páninen halyqaralyq olımpıadada qol jetkizgen nátıjeleri maqtanýǵa turarlyq. Qazaqstandyq oqýshylar ár qatysqan jyldary 16 altyn, 44 kúmis, 75 qola medal jáne 28 maqtaý qaǵazyn aldy. Dál osyndaı olımpıadalardyń júldegerlerine otandyq JOO-na konkýrstan tys negizde oqýǵa múmkindikter qarastyrylǵan. Sonymen qatar jeńimpazdar men jarysqa daıyndaǵan ustazdaryna bir rettik aqshalaı syılyq beriledi», - dedi Daryn respýblıkalyq ǵylymı-praktıkalyq ortalyǵynyń dırektory Ǵajdembek Tursynov.