Qazaqstandyq oqýshylar Máskeýde ótken «Matematıka jáne jobalaý» halyqaralyq baıqaýynda jobalary úshin júldeli oryndarǵa ilikti

Bul týraly QazAqparat tilshisine búgin QR Bilim jáne ǵylym mınıstrligi «Daryn» respýblıkalyq ǵylymı-tájirıbelik ortalyǵynan habarlady.

Konkýrs ǵylymı jobalardy qorǵaý úlgisinde tabıǵatta jáne qoǵamda shynaıy úrdisterdi matematıkalyq modeldeý, geometrııalyq mınıatıýralar, matematıka jáne óner, matematıka tarıhy, matematıka ǵylymy jáne elektrondyq taqyryptyq jýrnal sektsııalary boıynsha ótti.

Qazaqstandyq jas jobalaýshylar baıqaýdyń 4 sektsııasynda 27 joba usyndy. Qazylar alqasy Batys Qazaqstan oblysyndaǵy qazaq-túrik lıtseıiniń 10 synyp oqýshylary Danııar Jaqsylyqov pen Azamat Saǵıdanovtyń jumystaryn erekshe atap ótip, olar birinshi oryndy ıelendi.

Sondaı-aq Karına Han (Aqtóbe q. № 9 mektep), «Nur orda» qazaq-túrik lıtseıiniń (Astana q.) 10 synyp oqýshysy Shyńǵys Ábdihalyq pen Ashat Ábdisbekov, Batys Qazaqstan oblystyq qazaq-túrik lıtseıiniń oqýshylary Tólegen Tynyshtybaev pen Aıbek Rysqalıev, Aqtóbe qazaq-túrik lıtseıiniń shákirtteri Aıbol Dálenbaı men Nurdáýlet Súleımenov, Pavlodar qalasyndaǵy № 10 mektep lıtseıdiń túlegi Súleımen Rahymjanov ekinshi orynǵa taban tiredi. Al elordadaǵy QR Tuńǵysh Prezıdenti Intellektýaldyq mektebiniń úsh birdeı joǵary synyp oqýshylary Nursultan Esenqul, Іlııas Qabden, Almat Maratuly, O.Jáýtikov atyndaǵy daryndy balalarǵa arnalǵan respýblıkalyq mektep ınternattyń oqýshylary Beket Imatov, Dıas Tólegen, sonymen qatar S.Toraıǵyrov atyndaǵy Pavlodar memlekettik ýnıversıteti janyndaǵy daryndy balalarǵa arnalǵan oblystyq kópsalaly mektep lıtseıdiń shákirti Erjan Moldaǵalıev úshinshi oryn aldy.

«Daryn» ortalyǵynyń atap ótýinshe, konkýrs aıasynda oqýshylar úshin matematıka men ınformatıka salasynyń jetekshi ǵalymdary dáris oqyǵan. Sonymen qatar mádenı baǵdarlamasy aýqymynda qazaqstandyq oqýshylar Qarý-jaraq palatasynda bolyp, Tretıakov galereıasyndaǵy óner týyndylaryn tamashalaǵan.