Qazaqstandyq oqýshylar hımııa páninen halyqaralyq olımpıadada tórt medal utyp aldy

NUR-SULTAN. QazAqparat - Qazaqstandyq oqýshylar Hımııa páninen ótken halyqaralyq Olımpıadada (IChO-2021) 4 medal jeńip aldy, dep habarlaıdy QR Bilim jáne ǵylym mınıstrliginiń baspasóz qyzmeti.

Ulttyq quramanyń qorjynynda úsh kúmis jáne bir qola bar. Olımpıada Japonııanyń Osaka qalasynda 24 shilde men 2 tamyz aralyǵynda onlaın formatta ótti. Zııatkerlik jarysqa álemniń 79 elinen 312 oqýshy qatysty.

Qazaqstannyń atynan Nur-Sultan, Almaty, Qaraǵandy jáne Pavlodar qalasynan tórt oqýshy, ıaǵnı respýblıkalyq pándik olımpıadanyń jeńimpazdary qatysty. Ulttyq quramany jarysqa tájirıbeli pedagogter men jattyqtyrýshylar daıyndady.

Teorııalyq tapsyrmalardy joǵary deńgeıde oryndaǵan qazaqstandyq qatysýshylardyń barlyǵy júldeger atandy:

Qaıyrbek Haıdar,

Bısenalı Sanjar,

Qasymalı Madııar,

Turyspekova Áıgerim.

Ulttyq qurama músheleri oqý-jattyǵý jıyndary kezinde sapaly jumys júrgizgen muǵalimder men jattyqtyrýshylarǵa alǵys bildirdi.

«Barlyq qatysýshylar hımııa páninen eń mańyzdy olımpıadaǵa muqııat daıyndaldy. Bizdiń kúsh-jigerimizdiń aqtalǵanyna qýanyshymyz sheksiz. Joǵary deńgeıde ótip jatqan aýqymdy jarys bolǵandyqtan, tapsyrmalar da qıyn boldy. Biraq bizdiń qurama oǵan daıyn edi. 3 kúmis jáne 1 qola medal jeńip aldyq. Bizdi árdaıym qoldaıtyn jattyqtyrýshylarymyzǵa, muǵalimderimiz ben ata-analarymyzǵa alǵysymyz sheksiz», – dedi kúmis medal ıegeri Qaıyrbek Haıdar.

QR Bilim jáne ǵylym mınıstri Ashat Aımaǵambetov óziniń Facebook paraqshasynda barlyq qatysýshylardy jeńisterimen quttyqtady.

«Olımpıadaǵa qatysýshylardy joǵary jetistiktermen quttyqtaımyn! Sizder daıyndyqtaryńyzdyń myqty ekenin kórsettińizder. Ár medal sizderdiń qajyrly eńbekterińiz ben jeńiske degen umtylystaryńyzdyń nátıjesi. Sizderge jańa shyńdardy baǵyndyrýda sáttilik tileımin! Olımpıada júldegerleriniń ustazdary men jattyqtyrýshylaryna bergen bilimderi úshin, al ata-analaryna qoldaý kórsetkeni úshin alǵys aıtamyn. Óz kezeginde, Bilim jáne ǵylym mınıstrligi oqýshylarymyzdyń zııatkerlik jarystarda kóshbasshylyq orynǵa ıe bolýy úshin jaǵdaı jasaýdy jalǵastyrady», – dep jazdy Ashat Aımaǵambetov.

QR Bilim jáne ǵylym mınıstri Memleket Basshysy Qasym-Jomart Kemeluly Toqaev halyqaralyq olımpıadalardyń jeńimpazdary men júldegerlerin qoldaý boıynsha sharalar ázirleýdi tapsyrǵanyn aıtty. Osy tapsyrmany iske asyrý aıasynda mınıstrlik birqatar zańnamalyq ózgerister daıyndady.