Qazaqstandyq oqýshylar halyqaralyq zertteýde joǵary nátıje kórsetti
ASTANA. QazAqparat - Qazaqstan oqýshylary TIMSS-2015 halyqaralyq zertteýinde joǵary nátıjelerdi kórsetti, dep habarlaıdy QazAqparat.
«Búgin, 29 qarashada, Astana ýaqytymen saǵat 15.00-de IEA (International Association for the Evaluation Educational Achievement) Bilim berý jetistikterin baǵalaý jónindegi halyqaralyq qaýymdastyǵy TIMSS- 2015 (Trends in Mathematics and Science Study) zertteýiniń nátıjesi resmı túrde jarııalandy. Bizdiń oqýshylar jaratylystaný-matematıkalyq saýattylyǵy boıynsha Reseımen salystyrmaly nátıjeler kórsetip, AQSh, Anglııa, Germanııa, Kanada, Avtralııa, Izraıl, Shvetsııa, Danııa, Nıderlandy, Polsha, Chehııa, Lıtva, Malaızııa, Túrkııa jáne basqa memleketterdegi qurdastarynan ozyp shyqty»,-dep atap ótilgen QR BǴM Aqparattyq-taldaý ortalyǵy málimetinde.
Atap aıtqanda, qazaqstandyq oqýshylardyń matematıkalyq-jaratylystaný daıyndyq nátıjeleri halyqaralyq ortasha kórsetkishten aıtarlyqtaı joǵary. Elimizdiń segizinshi synyp oqýshylarynyń matematıka jáne jaratylystaný salalary boıynsha nátıjeleri 39 el ishinen 7 jáne 9 oryndardy ıelendi.
Tórtinshi synyp oqýshylarynyń ortasha kórsetkishiniń ósimi TIMSS-2011-men salystyrǵanda jaratylystaný ǵylymdary boıynsha 55 jáne matematıka boıynsha 43 upaıdy qurady. Bul - zertteýge qatysqan 49 eldiń arasynan 8-shi jáne 12-shi oryndar.
TIMSS-2015 zertteýiniń nátıjeleri týraly anaǵurlym tolyq aqparat 2016 jylǵy 30 qarashada jarııalanatyn bolady.
