Qazaqstandyq oqýshylar halyqaralyq chempıonatta 10 medal jeńip aldy
ASTANA. QazAqparat - Rýbık tekshesin (Kýbık rýbık) qurastyrýdan halyqaralyq «Kazakhstan Open 2017» ashyq chempıonaty 8 qazan kúni Astana qalasynyń fızıka-matematıka baǵytyndaǵy Nazarbaev zııatkerlik mektebinde óz máresine jetti, dep habarlaıdy QazAqparat tilshisi.
Álemdik deńgeıdegi dodada baq synaǵan qazaqstandyq oqýshylar Rýbık kýbıgin qurastyrýdyń 5 túrinen 10 medal jeńip aldy. Halqaralyq básekelerde el namysyn qorǵap, jeńis tuǵyrynan kórinip júrgen Janaıdar Uzaqov 2h2 (3.12 sekýnd), 3h3 (9.07 sekýnd) jáne 4h4 (33.55 sekýnd) túrinen altyn, Pıramıda (5.86 sekýnd) túrinen qola medal jeńip aldy.
Sonymen qatar, chempıonattyń Pıramıda túrinen jarysta Madıar Sovetov (5.24 sekýnd), Skıýb túrinen frantsııalyq Klement Cherblants (3.95 sekýnd) jeńimpaz atandy.
Aıta keteıik, Rýbıktan halyqaralyq ashyq chempıonat qazaqstanda alǵash ret ótkizilip, Dúnıejúzilik Kýbık qaýymdastyǵynyń (WCA) aıasynda uıymdastyryldy. Baıraqty básekege álemniń 7 elinen 126 qatysýshy óz baǵyn synap kórdi. Sondaı-aq, 115 qazaqstandyq kýbık-rýbık qurastyrýshylary álemdik deńgeıdegi básekege alǵash ret qatysýǵa múmkindik alyp otyr.
