Qazaqstandyq oqýshylar esepke júırik bolǵanymen, nátıjesin ómirde qoldana almaıdy - Dúnıejúzilik banktiń sarapshysy
ASTANA. QazAqparat - Qazaqstandyq oqýshylar esepterdi jaqsy sheshe alady, alaıda nátıjesin ómirde qajetti deńgeıde qoldana bilmeıdi.
Mundaı pikirdi bilim jetistikterin baǵalaý mamany, Dúnıejúzilik bank sarapshysy Mark Zelman Qazaqstannyń 2009, 2012 jyldary qatysqan Halyqaralyq oqýshylardyń fýnktsıonaldyq bilimdiligin baǵalaý baǵdarlamasyna (PISA - Programme for International Student Assessment) arnalǵan baspasóz máslıhatynda bildirdi.
«Qazaqstandaǵy oqýshylar máseleni sheshý jaǵynan, ıaǵnı formýla boıynsha matematıkalyq tásilmen kórsete bilý boıynsha aldyńǵy qatarda kele jatyr. Alaıda olar sol alynǵan jaýapty ómirmen baılanystyrýǵa kelgende kenje qalady», - dep túsindirdi ol.
Onyń aıtýynsha, PISA boıynsha 2009 jáne 2012 jyldardaǵy kórsetkishterdi salystyrǵan kezde, matematıka men jaratylystaný salasynda jaqsy nátıjelerge qol jetkizilgen. Al mátin oqý boıynsha aıtarlyqtaı alǵa basýshylyq baıqalmaǵan.
Sarapshynyń aıtýynsha, qazaqstandyq oqýshylar tolyq mátinderdi jaqsy oqyp, jaqsy túsine alady. Alaıda úzik mátinderdi, máselen dıagrammalarmen, grafıkalarmen, tablıtsalarmen berilgen mátinderdi qaǵyp alýda osaldyq tanytady.
«Qazaqstan úshin mektep baǵdarlamasyn oqýshylar teorııalyq bilimin tájirıbede kóptep qoldanýǵa beıimdep, synı turǵydan oılaýyna baǵyttaý qajet. Qazaqstandyq mektep baǵdarlamasy búgingi zaman talabyna jaýap beretindeı bilimdi ári zeıindi urpaq tárbıelep shyǵarýǵa azdyq etedi. Sondyqtan qazirgi kommýnıkatsııany, qazirgi bilim standarttaryn kóptep qoldaný kerek», - deıdi maman.
