Qazaqstandyq oqýshylar Dúnıejúzilik folklorlyq bı festıvalinde óner kórsetti

BRıÝSSELЬ. QazAqparat – Belgııada «Nomad» horeografııa akademııasynyń jas sheberleri qatysqan Búkilálemdik folklorlyq bı festıvali aıaqtaldy, dep habarlaıdy QazAqparat menshikti tilshisi.

Dúnıejúzilik folklor festıvali Belgııanyń Sen-Gılen qalasynda 40 jyldan beri ótkizilip keledi. Bıyl oǵan Qazaqstan, Kolýmbııa, Sıngapýr, Argentına jáne Polshadan 15 myń kórermen, 3 myń bala, 300 ónerpaz jınaldy.

Festıvalde «Nomad» (Astana) horeografııa akademııasynyń jas sheberleri «Qazaq dalasynyń ańyzy» spektaklin usyndy.

Akademııa basshysy Aınagúl Nurǵazına «QazAqparat» tilshisine «Qazaq dalasynyń ańyzy» horeografııalyq qoıylymy mahabbat taqyryby men adamdardy biriktiretin tańǵajaıyp týyndy ekenin aıtty.

Qoıylym qazaq qyzynyń batyldyǵy men náziktigin, sondaı-aq qazaq halqynyń salt-dástúrine adaldyǵy men qonaqjaılyǵyn kórsetedi.

«Qoıylymnyń jarqyn elementteriniń biri – ózindik ereksheligi men jańashyldyǵymen tańǵaldyratyn kostıýmder. Olardyń dızaıny men túsi keremet úılesim tapqan. Qoıylymnyń ózi sońǵy nota men ártisterdiń sońǵy qozǵalysyna deıin kórermendi joǵary emotsııaǵa bóleıdi»,- dep atap ótti A.Nurǵazına.

Aıta keteıik, qoıylym ártisteriniń barlyǵy balalar. Olar «NOMAD» horeografııa akademııasynyń oqýshylary.