Qazaqstandyq oqýshylar Batys Qytaı matematıkalyq olımpıadasynan júldemen oraldy
NUR-SULTAN. QazAqparat – Qazaqstandyq oqýshylar kezekti Batys Qytaı matematıkalyq olımpıadasynan 4 medal jeńip aldy, dep habarlaıdy QazAqparat «Daryn» respýblıkalyq ǵylymı-praktıkalyq ortalyǵyna silteme jasap.
«2019 jyldyń 11-16 tamyz aralyǵynda Qazaqstan Respýblıkasynyń qurama komandasy QHR-dyń Gýıchjoý provıntsııasy, Tszýnı qalasyndaǵy Batys Qytaı matematıkalyq olımpıadasyna qatysty. Olımpıadaǵa Sıngapýr, Fılıppın syndy elderden 212 oqýshy (26 komanda) qatysty», - delingen resmı habarlamada.
Nátıjesinde, Qazaqstan qurama komandasy 4 medal – 2 altyn jáne 2 kúmis júlde jeńip alǵan.
Jeńimpazdar arasynda Atyraý oblysy «Bilim-ınnovatsııa» mektep-ınternatynyń 10-synyp oqýshysy Aıbek Myrzataev (altyn), Almaty qalasy «Respýblıkalyq fızıka-matematıka mektebiniń» 11-synyp oqýshysy Aıdar Ámirın (altyn), Almaty qalasy «Bilim-ınnovatsııa» mamandandyrylǵan mektep-ınternatynyń 11-synyp oqýshysy Mıras Naǵashybek (kúmis) jáne elordalyq «Respýblıkalyq fızıka-matematıka mektebiniń» 11-synyp oqýshysy Sanjar Májıt (kúmis) bar.
Jalpy esepte qazaqstandyq komanda 168 upaı jınaǵan.
