Qazaqstandyq oqýshylar alǵashqy jartyjyldyqta túrli bilim dodalarynda 805 nagradaǵa ıe boldy - Ǵylym komıtetiniń tóraǵasy
ALMATY. 17 tamyz. QazAqparat - Bıyl birińǵaı ulttyq testileýde ortasha ball barlyq pánderde tómendedi. Bul týraly búgin Almatyda «Bilim berý júıesin jańǵyrtý - adamı kapıtaldyń sapaly ósýiniń basty baǵyty» degen taqyryppen ótken bilim berý qyzmetkerleriniń tamyz keńesinde aıtyldy.
«Qazaqstandyq oqýshylar 2011 jyly 900-den astam medal men gramotalar jeńip alǵan bolatyn. Bıyl alǵashqy jartyjyldyqta 805 nagrada aldy. Onyń 46-sy altyn. Qazaqstan quramasy álemde úzdik ondyqqa kirip qana qoımaı, Eýropa elderi men AQSh, Qytaı oqýshylaryna laıyqty básekeles bola aldy», - deıdi QR Bilim jáne ǵylym mınıstrliginiń Ǵylym komıtetiniń tóraǵasy Nurlan Ybyraıym. Onyń aıtýynsha, bıyl biryńǵaı ulttyq testileýde ortasha kórsetkish 70,2 ball boldy. Bul ótken jylǵydan 15,7 paıyzǵa kem. Eń joǵarǵy ortasha ball Almatyda boldy. Biryńǵaı ulttyq testileýdiń qorytyndysyna jasalǵan taldaýǵa qaraǵanda ortasha ball kórsetkishi barlyq oqý páninde tómendegen. Onyń ishinde barynsha kóp tómendegen pánder matematıka (9,8 ball) men tarıh (13,96 ball) bolyp otyr. «Altyn belgige» úmitker 5816 oqýshynyń 25 paıyzy ǵana óz bilimin dáleldedi. Almatyda óz bilimin dáleldegen úmitkerler 62,4 paıyzdy qurady. Bul - respýblıkadaǵy eń joǵarǵy kórsetkish bolyp otyr.
