Qazaqstandyq oqýshylar AQSh-ta ótetin robototehnıka chempıonatynyń joldamasyn sarapqa salady

ASTANA. QazAqparat - Oqý-aǵartý mınıstrligi men USTEM Robotics qoǵamdyq qorynyń qoldaýymen 24-26 aqpan aralyǵynda ál-Farabı atyndaǵy Oqýshylar saraıynda Ortalyq Azııa oıyndary ótedi, dep habarlaıdy QazAqparat.

Jeńimpazdar AQSh-taǵy halyqaralyq kezeńde el namysyn qorǵaıtyn bolady.

Chempıonat úsh jas sanatyna oraı ótedi: 6-10 jas aralyǵyndaǵy balalarǵa arnalǵan FIRST LEGO League Explore, 10-16 jas aralyǵyndaǵy FIRST LEGO League Challenge jáne 12-18 jas aralyǵyndaǵy FIRST Tech Challenge.

Jeńimpazdar Amerıkanyń Hıýston qalasynda ótetin halyqaralyq kezeńge joldama alady.

«Bıylǵy jarys energııa taqyrybyna arnalǵan. Balalar robottardy baǵdarlamalaý men qurastyrýdan basqa ınnovatsııalyq jobalarmen jumys isteıdi. Ózderiniń jergilikti qoǵamdastyǵy ishinde mańyzdy máselelerdi kóterdi. Ótken jyldyń sońynan bastap ár top ınstagramdaǵy FIRSTKZ2023 heshtegi arqyly tapsyrmalar oryndady. Balalar túrli energetıkalyq stantsııalarǵa baryp, reportaj jasap, sarapshylardan suhbat aldy. Oqý oryndarynda sheberlik sabaq ótkizdi, daıyndyq aıasynda elimizdegi myqty joǵary oqý oryndarynyń stýdentterimen tájirıbe bólisti. Jyl saıyn robototehnıkamen aınalysatyn balalardyń qatary kóbeıgenin baıqaýǵa bolady. Bul QR Oqý-aǵartý mınıstrliginiń qoldaýynyń nátıjesi»,- dedi USTEM Robotics qorynyń jetekshisi Asylbek Mýrzahmetov.

Esterińizge sala ketsek, FIRST Robotics dúnıejúzilik qozǵalysynyń irikteý kezeńi Astana, Almaty, Shymkent jáne Oral qalalarynda ótti. Oǵan 2 myǵnan astam oqýshy qatysty.

Sońǵy 3 jylda Qazaqstanda 3 myńnan astam robototehnıka kabıneti ashylyp, 2 myńnan astam muǵalim robototehnıka kýrstarynan ótti. 2022 jyldyń qazan aıynda bizdiń oqýshylar Jenevada ótken FIRST GLOBAL CHALLENGE Dúnıejúzilik jarysynda jeńiske jetti. Keıin Shymkent qalasynyń oqýshylary Dortmýnda ótken robototehnıka boıynsha Halyqaralyq Olımpıadada alǵash ret ekinshi oryn ıelendi.

Foto: Oqý-aǵartý mınıstrliginiń baspasóz qyzmeti