Qazaqstandyq oqýshy jańa áleýmettik jeli oılap tapty
Elorda Info atalǵan mekteptiń baspasóz qyzmetine silteme jasap habarlaýynsha, mobıldik qosymshany qoldanýshylar bir-birimen turaqty habarlasýǵa jáne derekter almasýǵa múmkindigi bar. Munda tirkelýshiler áleýmettik jelide sııaqty jeke profıldik-akkaýnt ashady jáne qosymshadaǵy basqa da qoldanýshylardy qaýymdastyqtarǵa engize alady.
«Memleket basshysy Qasym-Jomart Toqaevtyń jarlyǵymen kelesi jyl elimizde Volonter jyly bolyp belgilendi. Meniń bilýimshe, qazirgi aqparattyq keńistikte barlyq qazaqstandyq eriktilerdiń basyn qosatyn jáne olar týraly resmı málimet beretin derekter qory joq. Bul mobıldik qosymsha arqyly men osyndaı problemalardy sheshýdiń jolyn izdedim. «Shańyraq» uıaly baǵdarlamasynda jergilikti jáne basqa da aımaqtaǵy eriktiler týraly aqparattar, olardyń ótkizetin sharalary týraly habarlamalar jarııalanyp turady. Jobanyń balamasy retinde tanymal áleýmettik jelilerdi de aıtýǵa bolady. Biraq olardy paıdalanýdaǵy qaýipsizdik erejeleri barlyq kezde saqtala bermeıdi. Munda sondaı-aq qajetsiz jarnamalar men spam-eskertýler bolmaıdy», - deıdi 12-synyp oqýshysy Bıbarys Ǵılaj.
Mobıldik qosymsha Android Studio negizinde Java kómegimen jumys isteıdi. Jaqyn arada uıaly telefondarǵa arnalǵan kómekshi qural Play-market-te qoljetimdi bolmaq. Jas ónertapqyshtyń bul jumysyn qazylar alqasy mektepshilik jáne respýblıkalyq kezeńderdegi ǵylymı-jobalar saıysynda joǵary baǵalaǵan. Sonyń biri aǵymdaǵy jyldyń qyrkúıeginde ótken Qazaqstan Jastary kongresiniń ınnovatsııalyq jobalar baıqaýy.
«Endi avtorlyq týyndyǵa pantent alý jáne ony keń kólemdi qoldanysqa engizý qaldy», - deıdi Bıbarys Ǵılaj. Onyń aıtýynsha, bolashaqta bul mobıldik qosymsha eriktilerdiń jumysyn edáýir jeńildetedi. Olardyń nátıjeli jumysyn jan-jaqty kórsetýge, belsendiler men jańa qoldanýshylardy anyqtaýǵa múmkindik bermek.
Nazarbaev Zııatkerlik mektebiniń bolashaq túlegi baǵdarlamalaý kýrsymen birneshe jyldan beri aınalysady. Ol túrli oblystyq jáne respýblıkalyq IT-tehnologııalar men robototehnıka saıystarynyń júldegeri. Aǵymdaǵy jyly AQSh-tyń Stenford ýnıversıtetinde baǵdarlamalaý, kóshbasshylyq jáne áleýmettik ǵylymdar kýrsyn sátti támamdap shyqqan.
Foto ınternetten alyndy
