Qazaqstandyq oqýshy «sóıleıtin» qolǵap oılap tapty
ASTANA. QazAqparat - Aqtóbe qalasyndaǵy Nazarbaev zııatkerlik mektebiniń 9-synyp oqýshysy Nurdáýlet Taýmergenov «GloveSpeaker» mylqaýlarǵa arnalǵan qolǵap jasap shyǵardy. Ol óz jumysyn «Astana bolashaqtyń qalasy: Arhıtektýralyq elorda. 20 jyl» Naýryz kezdesýinde usyndy, dep habarlaıdy Elorda ınfo.
Qýat kózine qosylǵan qolǵap Bluetooth-ben telefonǵa baılanystyrylǵan. Batton atty batyrmany basqan kezde mátin sol sátte telefonnyń ekranyna shyǵady, keıin áıel daýysymen sóıleıtin baǵdarlama sol sózderdi aýyzsha aıtady.
«Biz mylqaý adamdarǵa kómekteskimiz keldi. Biz seriktesim ekeýmiz basqa platformalardy qaradyq, alaıda osy qolǵapqa toqtaýdy jón kórdik. Sebebi, ol únemi qolda júredi jáne yńǵaıly. Bul qolǵapty sý ótkizbeıtindeı, qysta jyly nemese kóktem men jazda yńǵaıly etip jasaýǵa bolady», - dedi ol.
Sondaı-aq, ol buǵan qosymsha uıaly telefonǵa arnalǵan arnaıy qoldanba jasap shyqqan.
«Onyń prototıpi 30 dollar turady. Biz ınternet-saıt arqyly Arduino protsessoryn satyp aldyq. Telefon bárimizde bar ǵoı. Tipti, Bluetooth-y bar eń qarapaıym telefon arqyly da dybysty tyńdaýǵa bolady», - dep atap ótti mektep oqýshysy.
