Qazaqstandyq oqýshy Kolýmbııada ótken olımpıadanyń júldegeri boldy

AQTÓBE. QazAqparat - Kolýmbııanyń astanasynda ótken halyqaralyq olımpıadanyń qola júldesin Aqtóbe qalasyndaǵy Nazarbaev zııatkerlik mektebiniń oqýshysy jeńip aldy, dep habarlaıdy QazAqparat tilshisi.

Bogota qalasynda dástúrli halyqaralyq jasóspirimder ǵylymı olımpıadasy (IJSO) aıaqtaldy. Qazaqstannan zııatkerlik dodaǵa alty oqýshy qatysty. Olımpıada qorytyndysy boıynsha Aıdana Aıtóre ІІІ orynǵa ıe boldy. Ol synaq, teorııalyq jáne eksperımenttik tapsyrmalardy sátti oryndady.

«Kolýmbııaǵa sapar óte qyzyqty ótti. Olımpıadanyń baǵdarlamasy aýqymdy boldy. Bul sapardyń jadymda uzaq saqtalatynyna senimdimin. Alǵan tájirıbemdi basqa olımpıadalarǵa qatysqan kezde qoldanamyn. Olımpıadanyń ereksheligi – oqýshylar bir ǵana emes, birden úsh, ıaǵnı, fızıka, bıologııa, hımııa pánderinen tapsyrmalar oryndaıdy. Qazaqstannan úsh pán boıynsha úzdik nátıje kórsetken 6 adam irikteldi. Birinshi kezeńde ár pán boıynsha 10 suraq keldi. Ekinshi kezeń teorııalyq, úshinshi kezeń eksperımenttik. Sońǵysyna komanda bolyp qatystyq, – dep bólisti Aıdana Aıtóre.
Olımpıada oflaın formatta 2-12 jeltoqsan aralyǵynda ótti. Bıyl Kolýmbııada 70 eldiń eń myqty fızıkteri, bıologtary men hımıkteri bas qosty.