Qazaqstandyq oqýshy «Kanagava» syılyǵynyń ıegeri atandy
NUR-SULTAN. QazAqparat - Taldyqorǵan qalasyndaǵy Nazarbaev Zııatkerlik mektebiniń oqýshysy Daır Serik «Childrens Museum of Art» atty XX Halyqaralyq balalar sýretiniń konkýrsynda «Kanagava syılyǵynyń» ıegeri atandy. Bul jaıynda aqparat atalǵan mekteptiń Feısbýktegi paraqshasynda jarııalandy, dep habarlaıdy QazAqparat tilshisi.
Mektep málimetinshe, Japonııanyń Kanagava prefektýrasynda ótken onlaın baıqaýǵa Eýropa, Afrıka, Azııa, Amerıka jáne Okeanııa elderinen 92 memleket qatysqan. Óner sabaǵynyń muǵalimi Tilesh Namazbekovtyń jetekshiligimen Daır Serik qazylar alqasynyń múshelerine peızaj janrynda oryndaldalǵan «Meniń týǵan ólkem - Jetisý» jumysyn usynǵan.
«Childrens Museum of Art» Halyqaralyq baıqaýynyń qorytyndysy boıynsha Taldyqorǵan qalasyndaǵy Nazarbaev Zııatkerlik mektebiniń oqýshysy Daır Seriktin sýreti 30 myń jumystyń ishinen top jaryp «Kanagava syılyǵymen» marapattaldy.
Sonymen qatar, «Meniń týǵan ólkem - Jetisý» peızajy eń úzdik shyǵarmalar jınaǵyna iriktelip alyndy.
Daır Serik Japonııadaǵy Halyqaralyq kórmesiniń jeńimpazdaryn marapattaý rásimine qatysýǵa shaqyrý aldy», delingen taratylǵan aqparatta.
