Qazaqstandyq oqýshy álemniń 4 úzdik oqý ornynan shaqyrtý aldy
ALMATY. QazAqparat - Almaty qalasynyń 12-synyp oqýshysy Muhammed-Álı Qanatbek Fordem ýnıversıtetinen, Dreksel ýnıversıtetinen, Gonkong baptıst ýnıversıtetinen jáne Brıtan Kolýmbııa ýnıversıtetinen shaqyrtý aldy. Bular álemdegi úzdik oqý oryndarynyń qatyrana kiredi, dep habarlaıdy QazAqparat tilshisi.
Muhammed-Álı Nazarbaev Zııatkerlik mektebinde fızıka-matematıka baǵytynda bilim alyp jatyr. Ol ulybrıtanııalyq Kolýmbııa ýnıversıtetiniń (álemde 34-oryn) Karen Mckellininternational Leaders of Tomorrow (KMILOT) Award stıpendııasynyń 33 ıegeriniń biri atandy. Professorlardyń úzdik quramy, jumysqa ornalasýdyń joǵary deńgeıi, jeke jobalardy damytý áleýeti - osynyń bári Ulybrıtanııalyq Kolýmbııa ýnıversıtetinde jasalǵan jaǵdaı. Sondyqtan zııatker dál osy ýnıversıtette oqýǵa sheshim qabyldaǵan. Oqý qyrkúıekte oflaın formatta bastalady.
«Okanagandaǵy kampýsty tańdaý sebebim – «bıznes jáne menedjment» mamandyǵy sáıkes keldi. Odan bólek, professorlarmen tikeleı jumys isteý múmkindigi bar. Oqýǵa túsýde kásibı baǵdar bergen Baǵjan Azamatqyzy úlken rol atqardy, sol úshin oǵan alǵysym sheksiz.Eger daıyndyqty aldyn ala, 2-3 jyl buryn bastamasańyz, onda turǵan eshteńe joq. Bastysy - nıet pen umtylys. Sonymen qatar, eger baǵalaryńyz nashar bolsa, oqýǵa túsý múmkin emes dep oılamańyz», - dedi Muhammed-Álı.
Muhammed-Álıdiń bilim salasynda kóptegen jetistikteri bar: ol 2019 jyly Garvard matematıkalyq olımpıadasynda (HMMT) qazaqstandyqtar arasynda birinshi oryndy jeńip aldy, Oracle Kazakhstan-da taǵylymdamadan ótti, 2000+ adamǵa arnalǵan óziniń halyqaralyq bıznes-ınkýbatory bar.
