Qazaqstandyq oqýshy aǵylshyn ǵalymy Stıven Hokıngpen kezdesedi
ASTANA. QazAqparat - Tserebraldi saldaný dertine baılanysty arbaǵa tańylǵan tarazdyq 14jasar Isak Mýstopýlo birazdan beri aǵylshyn ǵalymy Stıven Hokıngtiń eńbekterin oqyp, shabyttanǵan. Qazirgi kezde onyń atalǵan ǵalymmen kezdesýin uıymdastyrý sharasy iske asyrylmaq.
I. Mýstopýlo «Úılesimdilik teorııasyn» oılap taýyp, oqýshylar arasynda ótetin Ulttyq ınnovatsııalyq jobalar konkýrsynyń arnaıy syılyǵyna ıe boldy.
Ol óziniń armany jaıynda QR Investıtsııalar jáne damý mınıstri Áset Isekeshevke aıtqan bolatyn.
Búgin Ortalyq kommýnıkatsııalar qyzmetindegi baspasóz máslıhatynda «Tehnologııalyq damý jónindegi agenttik» AQ basqarma tóraǵasynyń orynbasary Jumataı Sálimov Isaak úshin Ulybrıtanııaǵa arnaıy sapardy uıymdastyrý josparlanyp otyrǵanyn jetkizdi.
«Bul atalym boıynsha bizde jeke sapar qarastyrylmaǵan bolatyn. Alaıda, biz osy máseleni pysyqtap jatyrmyz. Brıtandyq keńes Isaakty kútip alatyndyqtaryn aıtty. Stıven Hokıng egde jastaǵy adam ekeni jáne sheteldik saparlary kóp ekeni belgili. Onyń komandasy bizdiń usynysymyzǵa qyzyǵýshylyq bildirip, kezdesý ótkizýge, talqylaýǵa kelisti. Sondyqtan da brıtandyq ǵylym murajaıyna, Kembrıdjge saparlaýdy josparladyq. Jaqynda Isaak Ulybrıtanııaǵa saparlaıdy dep kútip otyrmyz»,-dedi J. Sálimov.
I.Mýstopýlo «Úılesimdilik teorııasy» jobasy aıasynda ǵarysh kemeleri paıdalanatyn jańa qýat kózin tabýdy maqsat etip otyr.
