Qazaqstandyq ofıtser Kot-d' Ivýardaǵy mıssııa nátıjeleri boıynsha BUU medalimen marapattaldy
Áskerı baqylaýshy retinde ol bir jyl boıy beıbitshilik pen qaýipsizdikti qoldaý jónindegi BUU mıssııasyna qatysty. Bul mıssııaǵa qatysýshy áskerı qyzmetshilerdiń negizgi mindetteri Malı Respýblıkasyndaǵy shekara aýdandaryndaǵy jalpy ahýalǵa, atap aıtqanda, beıtanys qarýly quramalardyń zańsyz shekaradan ótýin anyqtaý, narkotıkalyq jáne túrli psıhotroptyq zattardy, túrli qarýlar men oq-dárilerdi, jarylys zattaryn, sondaı-aq olardyń túrli komponentterin anyqtaý, shıelenisti oqıǵalardan keıin elge oralatyn bosqyndardyń aýysýyn baqylaý monıtorıngin jasaý boldy.
Kapıtan Asylhan Amanǵalıuly mıssııa barysynda úzdik bitimgershilik daıarlyǵy bar bilikti maman, ofıtser retinde kórinip, áskerı baqylaýshylarǵa berilgen talaptardy minsiz jáne úlgili oryndaǵany úshin BUU medalimen marapattaldy.
Bitimgershilik is-qımyly halyqaralyq mindettemelerdi oryndaýda, Qazaqstannyń múddesi men álemdik arenada eldiń bedelin, áskerı-saıası ustanymdardy arttyrýda mańyzdy. Qazaqstandyq bitimgershilik toptarynyń daıarlyǵy búginde halyqaralyq standartqa sáıkes. Osy baǵyttarda bitimgershilik operatsııalaryna daıarlyq jóninde kýrstar uıymdastyrylyp, oqý-jattyǵý ortalyqtary quryldy.
Atalǵan jerlerde BUU mıssııasyna qatysýda tájirıbesi bar ofıtserler tájirıbelerimen bólisip, ózderiniń áriptesterin oqytady. Birikken Ulttar Uıymy qazaqstandyq ofıtserlerdiń BUU aǵymdaǵy operatsııalaryna qosqan úlesin atap ótip, qazaqstandyq bitimgershilik bólimshelerdiń daıarlyǵyna joǵary baǵa berdi.
Qazirgi ýaqytta BUU bitimgershilik mıssııasymen QR QK tórt ofıtseri qyzmet etip júr. Áskerı baqylaýshy retinde olar Batys Saharadaǵy mıssııalarǵa qatysýda. 2014 jyldyń shildesinen bastap Batys Sahara men Kot-D'Ivýardaǵy BUU beıbitshilikti qoldaý jónindegi operatsııalaryna áskerı baqylaýshylar retinde Qazaqstan Qarýly Kúshterinen barlyǵy 11 ofıtser qatysty.
