Qazaqstandyq nokaýtshynyń Kovalev - Alvares boks keshindegi qarsylasy belgili boldy

ASTANA. QazAqparat - Qazaqstandyq boksshy Meıirim Nursultanov (7-0, 6 KO) kelesi jekpe-jegin 4 tamyz kúni AQSh-tyń Atlantık-Sıtı qalasynda (Nıý-Djersı shtaty) ótkizedi, dep habarlaıdy QazAqparat Sports.kz-ke silteme jasap.

Meıirim Sergeı Kovalev (32-2-1, 28 KO) jáne kolýmbııalyq Eleıder Alvares (23-0, 11 KO) boks keshiniń anderkardynda óner kórsetedi. Segiz raýndqa shaqtalǵan aıqasta Nursultanov Domınıkan Respýblıkasynyń 33 jastaǵy boksshysy Honatan Batıstamen (17-14, 10 KO) kúsh synasady.

Meıirim Nursultanov 23 maýsym kúni Los-Andjeleste meksıkalyq Hosýe Obandomen (16-21-1, 12 KO) aıqasyp, altynshy raýndta tehnıkalyq nokaýtpen jeńiske jetken bolatyn.

Batısta sońǵy jekpe-jegin 16 maýsymda ótkizgen. Onda kýbalyq Iordenıs Ýgastan (22-3, 11 KO) ekinshi raýndta nokaýtpen jeńilgen.