Qazaqstandyq nokaýter 20 ret jeńimpaz atanǵan amerıkalyq boksshymen kezdesedi

NUR-SULTAN. QazAqparat - «Baha-oq» (Baha-pýlıa) degen laqap atpen tanymal qazaqstandyq kásipqoı boksshy Bahtııar Eıýbov kezekti jekpe-jegin sharshy alańda 20 márte jeńiske jetken amerıkalyq Sonnı Fredrıksonmen ótkizedi, dep habarlaıdy QazAqparat tilshisi.

Qazaqstan kásipqoı boks federatsııasynyń VKontakte paraqshasynda habarlaǵandaı, Bahtııar Eıýbov (15-0, 12KO) sharshy alańǵa osy aıdyń sońynda shyǵady.

«BoxRec.com aqparatyna súıensek, Bahtııardyń kelesi kezdesýi 27 sáýir kúni Lafaıett qalasynda (AQSh, Lýızıana shtaty) ótedi. Qazaqstandyq ýaqyt boıynsha aıqas 28 sáýirge keledi. 32 jastaǵy qazaqstandyq boksshynyń qarsylasy - 24 jastaǵy Sonnı Fredrıkson (20-1, 13KO). Birinshi orta salmaqtaǵy aıqas on raýndqa josparlanyp otyr», - delingen federatsııa habarlamasynda.

Aıta keterligi, Malveınede (Kanzas shtaty) ótken sońǵy aıqasynda Eıýbov kásipqoı boksta tuńǵysh ret qarsylasy meksıkalyq boksshy Hose Lýıs Rodrıgesti (25-13-1, 13KO) jeńe almaı, teń túsken edi.