Qazaqstandyq «Nık Výıchıch» Maradonaǵa shapan syılady
ASTANA. QazAqparat - Aıaqsyz týǵan astanalyq oqýshy Álı Turǵanbekov aty ańyzǵa aınalǵan fýtbolshy Dıego Armando Maradonamen kezdesti, dep habarlaıdy QazAqparat.
«Álemdik fýtbol juldyzy meniń ulymdy óz nemeresindeı qushaqtap, baýyryna basty. Bul sezimdi sózben aıtyp jetkize almaımyn, qýanyshtan jylap otyrmyn! Barlyǵy tátti tústeı boldy. Álı qaqpashy bolyp, dopty qaǵyp alǵanda jáne pas bergende Dıego tańdanysyn jasyrmady», - dep jazdy Álıdiń anasy Aqmaral Ámireeva Instagram paraqshasyna.
Onyń aıtýynsha, tanymal fýtbolshymen kezdesýge otbasy aldyn ala daıyndalǵan jáne syılyq retinde ulttyq shapan satyp alǵan.
«Bul kezdesý aldyn ala josparlanǵan bolatyn jáne biz Maradonaǵa asa qurmetti adamdarǵa syılanatyn ulttyq shapan syıladyq. Óz kezeginde, Maradona Álıge jeıde syılap, oǵan qoltańbasyn qoıdy. Bul Álıdiń eń úlken armany edi - dop nemese jeıde alsam eken dep tiledi. Aqyrynda dopty da, jeıdeni de aldy», - dedi Aqmaral QazAqparat tilshisine telefon arqyly bergen suhbatynda.
Sondaı-aq, A. Ámireeva ulynyń túrli kedergilerge tap bolatynyn da jasyrmady jáne erekshe balalarǵa arnalǵan arnaıy sport úıirmelerin ashýdy usyndy.
«Álıdi birqatar fýtbol úıirmeleri qabyldamady. Onyń densaýlyǵynan qaýiptengen bolar. Mundaı balalar qarapaıym úıirmelerge qabyldanbasa, arnaıy úıirmeler ashsyn. Olardyń sportqa degen qulshynysyn óshirmeýimiz kerek. Kerisinshe, ınklıýzıvti tásildi damyta túsý qajet», - dedi Álıdiń anasy.
Aıta keteıik, buǵan deıin Álı Turǵanbaev óz kýmıri, belgili orator Nık Výıchıchpen kezdesti. Nık Výıchıch Qazaqstandaǵy osyndaı balalardyń ata-analarynyń birigýi kerektigin aıtyp, oǵan qal-qadirinshe kómek kórsetetindigin aıtty.
