Qazaqstandyq «Nık Výıchıch» aıaǵymen júre bastady
Álıge arnalǵan protez aıaqtardy túrkııalyq mamandar ázirlegen.
«Meniń jolbarysym júrýdi úırenip keledi. Endi qýanyshtan ǵana kózge jas kelsin dep tileımin! Allaǵa shúkir, ulymnyń armandary oryndalyp keledi. Árıne, Allanyń kómegi meıirimdi adamdar arqyly bizge jetedi. Rııasyz sezimmen qol ushyn sozǵan barsha adamdarǵa alǵys aıtamyz. Ulym ekeýmizdiń boıymyz teńesti jáne biz uzaq ýaqyt boıy qushaqtasyp turdyq. «Mama, meniń boıym senimen birdeı boldy, tipti Ámirden (inisi - red.) de asyp ketti», - dedi Álı. Dál osy baqyt úshin, dál osy qýanyshyń úshin taýdy da qoparýǵa daıynbyz, ulym. Tek sen armandaýdy doǵarma. Armanǵa jeter jol ońaı bolmady, túrli qıyndyqtarǵa tap boldyq. Eń bastysy eńseni túsirmeı, alǵa jyljý kerek. Bul - Álı ekeýmizdiń basty qaǵıdamyz», - dep jazdy Álıdiń anasy Aqmaral Ábikeeva Facebook paraqshasynda.
Aıta keteıik, buǵan deıin Álı Turǵanbaev óz kýmıri, belgili orator Nık Výıchıchpen jáne áıgili fýtbolshy Dıego Armando Maradonamen kezdesken bolatyn. Nık Výıchıch Qazaqstandaǵy osyndaı balalardyń ata-analarynyń birigýi kerektigin aıtyp, oǵan qal-qadirinshe kómek kórsetetindigin aıtty.