Qazaqstandyq neırohırýrgtar oılap tapqan 3D ımplant patent aldy

ASTANA. QazAqparat – Astanalyq neırohırýrgtar omyrtqanyń fızıologııalyq qurylymyn tolyǵymen qaıtalaıtyn 3D ımplant oılap tapty. Otandyq noý-haý týraly ulttyq neırohırýrgııa ortalyǵynyń basqarma tóraǵasy Serik Aqsholaqov aıtyp berdi, dep habarlaıdy QazAqparat tilshisi.

«Bizdiń mamandar úzdik tájirıbelerdi engizip qana qoımaı, ǵylymı-zertteý jumystarymen de aınalysady. Osy ýaqytqa deıin 10-nan astam granttyq zertteý júrgizdi. Sonyń biri - «Ǵalam» ǵarysh apparattaryn óndirýshi uıymmen birlesken joba. Omyrtqanyń fızıologııalyq qurylymyn tolyǵymen qaıtalaıtyn árbir patsıent úshin jeke 3D ımplant ázirlendi. Bul - qazaqstandyq noý-haý, bizdiń ortalyqtyń ıdeıasy. Ǵylymı zertteýdiń eksperımenttik bóligi Germanııadaǵy travmatologııa jáne bıomehanıka ınstıtýtynda júrgizildi al preparattyń obektisi AQSh-tan alyndy»,- dedi Serik Aqsholaqov elordada ótip jatqan neırohırýrgtardyń V kongresinde.

Onyń aıtýynsha, ǵylymı jańalyq oń nátıjeli ruqsat qujatyn alǵannan keıin gemangıoma jáne omyrtqa zaqymdanýy bar naýqastarǵa 4 ota jasalǵan.

«3D ımplantqa patent alyndy. Slaıdtan standartty ımplanttar men bizdiń jeke ázirlegen ımplanttardyń aıyrmashylyǵyn kóresiz. Bul ádistiń artyqshylyqtary: irgeles omyrtqalardyń sońǵy taqtalarymen 100% sáıkestik, baılanys aımaǵyndaǵy eń joǵary kerneýlerdi azaıtý, omyrtqanyń turaqtylyǵy men bıomehanıkasyn qoldaý», - deıdi ol.