Qazaqstandyq neırohırýrgııa eýropalyq deńgeıge jetti - sarapshylar
ALMATY. QazAqparat - Qazaqstanda neırohırýrgııa qyzmeti eýropalyq deńgeıge jetti. Álemdik sarapshylar Almaty qalasy №7 qalalyq klınıkalyq aýrýhanasynda ótken halyqaralyq neırohırýrgter konferentsııasynda osyndaı pikir bildirdi.
Alqaly jıynǵa Germanııa, Reseı, Japonııa men Ońtústik Koreıa, Belarýs elinen mamandar kelgen.
Mamandar qazaqstandyq neırohırýrgııa salasynyń jetken jetistikterin joǵary baǵalady.
TMD elderiniń arasynda Qazaqstan alǵashqylardyń biri bolyp úsh ınnovatsııalyq qurylǵynyń birikken júıesi arqyly em júrgizýdi qolǵa aldy. Atap aıtqanda, birinshisi - kompıýterlik tomografııa, ekinshisi - navıgatsııalyq júıeler, sońǵysy - zamanaýı operatsııalyq mıkroskop. Bul kúrdeli operatsııalar kezinde baqylaýdy kúsheıtýge kómektesedi. Sebebi, apparattar vızýalızatsııany jaqsarta túsedi.
Almaty qalasy №7 qalalyq klınıkalyq aýrýhanasynyń bas dárigeri Marat Abdýllaevtyń aıtýynsha, bıyl Almaty qalasy Densaýlyq basqarmasynyń qoldaýymen zamanaýı neıronavıgator ornatylatyn bolady.
«Bul jańa qurylǵynyń iske qosylýy naýqastar úshin qýanyshty jańalyq ári qazaqstandyq neırohırýrgterdiń múmkindigin arttyrady. Bizdiń aýrýhanada TMD elderi arasynda birinshi bolyp zamanaýı operatsııalyq bólme jasaqtalady», - dedi Marat Shadybaıuly.
«Qazaqstan halyqaralyq alańda aldyńǵy qatarǵa shyqty. Onyń neırohırýrgııa salasyndaǵy áleýeti joǵary. Sebebi, zamanaýı apparattardyń barlyq túri bar. Mundaı qurylǵylar Reseıdiń keıbir úzdik dep sanalatyn emhanalarynda da joq. Neırohırýrgter qyzmeti sapasynyń joǵary ekenin de atap ótken jón. Qazir sizderdiń qatarlaryńyzda halyqaralyq deńgeıdegi mamandar bar, olar júzden asa operatsııa jasaǵan. Demek, sizder halyqaralyq deńgeıdegi básekege qabilettisizder. Bilikti mamandar izdep, shetel asýdyń qajeti joq», - dedi reseılik bilikti neırohırýrg, Irkýtsk hırýrgııa men travmatologııa ǵylymı ortalyǵy neırohırýrgııa ǵylymı-klınıkalyq bóliminiń jetekshisi Vadım Byvaltsev.
Al Germanııadan kelgen mamandar mı isigi men bas-súıegi, omyrtqa jáne julyn jaraqatyna jasalatyn kúrdeli operatsııalar zamanaýı ádis-tásildermen tolyǵyp, jańa deńgeıge kóterilgenin atap ótti.
Uıymdastyrýshylardyń aıtýynsha, mundaı kezdesýler pikir almasyp, tájirıbe bólisýge taptyrmaıtyn múmkindik. Bul qazaqstandyq mamandardyń biliktiligin arttyrýǵa kerek. Al bilikti maman halyqqa aýadaı qajet.
Ǵylymı konferentsııa sheńberinde julyn men bas-jaq súıegi taqyrybynda eki sheberlik saǵaty uıymdastyrylyp, operatsııa ústelinen tikeleı efırde kórsetildi.
Konferentsııany uıymdastyrýǵa QR Densaýlyq saqtaý mınıstrligi, Almaty qalasy Densaýlyq basqarmasy, Almaty qalasy №7 qalalyq klınıkalyq aýrýhanasy men «Qazaq neırohırýrgtarynyń qaýymdastyǵy» qoǵamdyq birlestiginiń Almaty fılıaly, Qazaq medıtsınalyq úzdiksiz bilim berý ýnıversıteti, «Qoǵamnyń densaýlyq saqtaý joǵarǵy mektebi» qazaqstandyq medıtsınalyq ýnıversıteti atsalysty.
