Qazaqstandyq naryq sapaly otandyq taýar men qyzmet túrlerine zárý - Indýstrııa jáne saýda vıtse-mınıstri

ASTANA. Qazannyń 22-si. QazAqparat /Aıdar Ospanalıev/ - Búgin Parlament Májilisinde Indýstrııa jáne saýda mınıstrliginiń ókilderi depýtattardy «Qazaqstan Respýblıkasynyń keıbir zańnamalyq aktilerine qazaqstandyq qamtý máseleleri boıynsha ózgerister men tolyqtyrýlar engizý týraly» zań jobasymen tanystyrdy,

dep habarlaıdy QazAqparat.

Indýstrııa jáne saýda vıtse-mınıstri Erhat Esqalıevtiń aıtýynsha, mınıstrlik tarapynan júrgizilgen saraptaý jumystary elimizdegi birqatar salalar boıynsha óndiriletin taýarlardyń arasynda  qazaqstandyq úlestiń salmaǵy múldem az ekendigin kórsetti. Al talqylaýǵa usynylyp otyrǵan qujat osy olqylyqtardyń ornyn toltyrýǵa baǵyttalǵan. «Jalpy qazaqstandyq úleske keletin bolsaq, búginde naryq sapaly qazaqstandyq taýar men qyzmet túrlerine zárý. Óıtkeni bizde elde óndiriletin taýarlardyń otandyq úlesiniń salmaǵyn rettep otyratyn naqty júıe joq. Onyń ústine eldegi halyqaralyq talaptar negizinde qyzmet kórsetetin mamandar da tapshy. Qazaqstandyq taýardyń úles salmaǵynyń qanshalyqty ekendigin naqty baqylap, monıtorıng júrgizip otyrǵan organ da joq. Osynyń bári jınalyp, qazaqstandyq úles degen máseleniń kóterilýine negiz bolyp otyr», dedi vıtse-mınıstr.

Onyń sózine qaraǵanda, zań jobasyn daıyndaýdaǵy basty maqsat - ishki naryqtyń múmkindikterin paıdalana otyryp, básekege qabiletti ónim men qyzmet túrlerin jetildirýge qajetti jaǵdaı jasaý.