Qazaqstandyq mýzykanttar Túrkııadaǵy «Shyǵys pen batystyń kezdesýi» festıvalinde zor qoshemetke ıe boldy
YSTAMBUL. 22 qazan. QazAqparat - Qazaqstandyq mýzykanttar «Shyǵys pen Batystyń kezdesýi» ІІІ halyqaralyq mýzykalyq festıvalinde kórermen yqylasyna ıe boldy.
Sımfonııalyq mýzyka festıvali 30 qyrkúıek pen 19 qazan aralyǵynda Túrkııada ótti. Oǵan álemniń 11 elinen kelgen kameralyq orkestrler, mýzykanttar men solıster qatysty.
QR-nyń Túrkııadaǵy Elshiliginiń qoldaýymen Qazaqstannyń atynan kameralyq orkestr men solıster - Almatydaǵy Jambyl Jabaev atyndaǵy Qazaq memlekettik fılarmonııasynan Gúlnar Nurǵalıeva (soprano) jáne Ǵalııa Bısenǵalıeva (skrıpka), Ámir Bısenǵalıev (skrıpka) óner kórsetti.
Orkestr Vıvaldı, Sarasate, Mendelson, A.Serkebaev jáne taǵy basqa kompozıtorlardyń shyǵarmalaryn asqan sheberlikpen oryndady. Qazaqstandyq ártisterdiń óneri Ankara turǵyndary men festıval qonaqtarynyń ystyq yqylasyna ıe boldy.
