Qazaqstandyq múgedektigi bar áıelder óz quqyqtaryn alǵa tartý úshin birlesken strategııany ázirleýde
ALMATY. 12 sáýir. QazAqparat /Ádilet Musahaev/ - Almatyda Ońtústik, Batys jáne Soltústik, Shyǵys Qazaqstannan múgedektigi bar áıelder uıymdarynyń 14 kóshbasshysynyń qatysýymen strategııalyq josparlaý jónindegi semınar ótip jatyr.
Sáýirdiń 14-ine deıin jalǵasatyn semınar barysynda qatysýshylar ózderiniń uıymdarynyń ishki jáne syrtqy qyzmetin talqylap, oǵan taldaý jasap, jelilik qyzmetti damytý úshin basymdy mindetterin belgilemek. «Semınardyń maqsaty - tek uıymdardyń strategııalyq josparlaryn jazý daǵdylary men bilim usyný ǵana emes, Qazaqstannyń múgedektigi bar áıelderi úshin quqyqtaryn alǵa tartý jáne múmkindikterin keńeıtý maqsatynda uzaq merzimdi perspektıvaǵa birlesken Jeli strategııasyn ázirleý bolyp tabylady», - deıdi «Shyraq» múgedek áıelder qaýymdastyǵynyń tóraǵasy Lázzat Qaltaeva.
Sonymen qatar ol 2010 jyldyń sáýir aıynan tamyz aıyna deıin Qazaqstannyń úsh aımaǵynda áıelder kóshbasshylyǵy boıynsha úsh modýl ótkizilgendigin aıtty. «Búgingi tańda atalǵan joba aıasynda múgedektigi bar áıelderdiń quqyqtaryn alǵa tartatyn jáne olardyń barynsha qoǵamǵa aralasýyna múmkindik jasaıtyn Ońtústik, Batys jáne Soltústik, Shyǵys Qazaqstannyń on tórt ÚEU-nan turatyn múgedektigi bar áıelder uıymdarynyń jelisi quryldy», - deıdiL.Qaltaeva.
Elimizde 485,4 myńnan astam, ıaǵnı halyqtyń jalpy sanynyń 3 paıyzy múmkinshiligi shekteýli adamdar eken. Olardyń 231 myńǵa jýyǵy qyzdar men áıelder, bul Qazaqstannyń múmkinshiligi shekteýli adamdardyń 48% quraıdy.
Joba 150 000-ǵa jýyq eýro kóleminde Eýropalyq Odaqpen qarjylandyrylýda. Atalǵan shara QR Eńbek jáne halyqty áleýmettik qorǵaý mınıstrliginiń qoldaýymen jáne Halyqaralyq ÚEU zertteý jáne olardy oqytý ortalyǵymen, "Kıýnnıýs" Qaýymdastyǵy (Fınlıandııa), ıÝNIFEM jáne «Shyraq» múgedek áıelder qaýymdastyǵymen júzege asyrylýda.
