Qazaqstandyq mýaıtaıshylar Álem chempıonatynda bes medal aldy
NUR-SULTAN. QazAqparat - 20-29 shilde aralyǵynda Taıland eliniń Bangkok qalasynda eresekter arasynada mýaıtaıdan Álem chempıonaty ótti. Bul dodada Qazaqstan quramasy 5 medal enshiledi, dep habarlaıdy QazAqparat.
Eki dıvızıonda óner kórsetken (17-23 jas) 13 sportshynyń arasynda - Baqytjan Áriphanov (51 keli), Elaman Saıasatov (54 keli) jáne Ilmıra Kýnahýnovalar (67 keli) qola medalǵa ıe bolsa, 60 keli salmaqta (class U23) óner kórsetken Erqanat Ospan kúmis júldege qol jetkizdi. Alǵashqy jekpe-jekte E.Ospan ýkraınalyq Sergeı Radovty nokaýtqa túsirdi. Shırek fınalda malaızııalyq Mohd Fazadkıdy utyp, jartylaı fınalda kolýmbııalyq Tomas Chaverany jeńdi. Biraq fınalda Erqanat qytaılyq Iong Chenge ese jiberdi.
Sondaı-aq 57 keli salmaq dárejesinde (Elite A) Almaz Sársembekov álem chempıony atandy. Jartylaı fınalda Almaz ýkraınalyq Vladıslav Mıkıtasty utty. Al fınalda Sársembekov reseılik Sergeı Abramovty upaı sanymen jeńdi. Qazaqstan úshin, bul kópten kútken altyn júlde.
Sońǵy ret - 12 jyl buryn qazaqstandyq taıboksshy Almaz Kasenov (81 keli) elıtalyq A-klasta álem chempıony atanǵan bolatyn.
QR mýaıtaı federatsııasynyń málimetine sáıkes, jalpy medaldyq esepte Qazaqstan quramasy 5 júldemen (1 altyn, 1 kúmis, 3 qola) 10-orynǵa taban tiredi. Bangkokta ótken Álem chempıonatyna 99 memleket qatysty.
