Qazaqstandyq Mimioriki brendi men Disney balalar kıiminiń birlesken jelisi iske qosyldy
Disney kompanııasy Reseı naryǵyndaǵy №1 lıtsenzıat bola otyryp, iri halyqaralyq kompanııalarmen, reseılik óndirýshilermen jáne dıstrıbıýtorlarmen belsendi túrde seriktese jumys júrgizedi. Qazirgi tańda kompanııanyń 300-ge tarta seriktes-lıtsenzıaty bar. Olardyń qatarynda naryqta moıyndalǵan kóshbasshylar da, jańadan órkendep kele jatqan jas kompanııalar da jetkilikti. Otandyq Mimioriki brendi – Reseı men TMD elderindegi Disney kompanııasynyń eń alǵashqy lıtsenzıaty.
Kelisim shartyna sáıkes, qazaqstandyq brend kıim-keshek dızaınynda «Muzdy ólke», «Arystan patsha», «Ańdar polısi» sekildi Disney fılmderiniń kópshilik súıetin keıipkerleriniń, Disney-diń Mıkkı Maýs jáne Vınnı qonjyq sekildi klassıkalyq keıipkerleriniń, sonymen qatar MARVEL kınoálemindegi Órmekshi-adam, Temir adam, Halk pen Kapıtan Amerıkanyń, «Juldyzdy Shaıqastar» dastanyndaǵy keıipkerlerdiń sýretterin paıdalana alady. Mimioriki lıtsenzııalyq jelisinde fýtbolkalar, jempirler, svıtshottar, shalbarlar, kóılekter jáne taǵy basqa kóptegen zattar bar.
«Mimioriki sekildi naryqtyń iri oıynshysymen seriktestik Qazaqstan tutynýshylaryna jetý jolynda Reseı men TMD-daǵy Disney kompanııasy úshin mańyzdy kezeń bolyp otyr. El ishinen oryn tapqan beıildi aýdıtorııasy men tolyqqandy ózindik óndiristik tsıkli bar aıryqsha brend tutynýshylardyń talap-tilegine saı keleri sózsiz. Biz balalar men olardyń ata-analaryn qýantatyn Mimioriki brendimen birge jańa kollektsııalardy qurý múmkindiginiń paıda bolǵanyna qýanyshtymyz», - deıdi Reseı men TMD-daǵy Disney kompanııasynyń lıtsenzııalaý jáne bólshek saýdamen jumys departamentiniń dırektory Sergeı Pıchýgın.
Mimioriki kompanııasy The Walt Disney Company arnaıy ázirlegen halyqaralyq ILS eńbek standartynyń sáıkestigi boıynsha áleýmettik aýdıtten sátti ótti. Bul protsedýra kelisimge qol qoıýda mindetti bolyp sanalady.
«Bul biz úshin zor maqtanysh ári aýqymdy syn bolmaq! Bir jaǵynan Disney-diń jahandyq úlken tarıhynda izimiz bolatynyna, súıikti keıipkerler sýrettelgen jáne bizdiń aýdıtorııaǵa qazaq jáne orys tilindegi uransózder jazylǵan kıim-keshekpen balalarǵa shattyq syılaıtynymyzǵa qýanyshtymyz. Ekinshi jaǵynan bul qadam bizdiń kompanııanyń ár mamany úshin orasan zor ósim bolary daýsyz. Sebebi Disney standarttarynyń talaby tym joǵary», - dedi Mimioriki kompanııasynyń bas dırektory Inna Apenko.
Kelisimge kele otyryp Mimioriki balalar kıim-keshegi óndirisin 30% arttyryp, Disney keıipkerleri sýrettelgen 100 myńǵa tarta ónim shyǵarýdy kózdeıdi. Disney klassıkasyndaǵy alǵashqy kollektsııalar – teńdessiz Mıkkı men Mınnı 2020 jyldyń 1 sáýirinde satylymǵa shyǵady. Búkil jańa ónim Qazaqstan aýmaǵynda satylady. Qazirgi tańda Mimioriki-diń Qazaqstanda franshıza boıynsha 4 jeke jáne 11 ashyq dúkeni bar. Ár maýsymda 9-10 kollektsııa nemese 450 biregeı model shyǵarady.
Disney lıtsenzııalyq kıimi Mimioriki brendiniń barlyq fırmalyq dúkenderinde, brendtiń seriktes dúkenderinde, mamandandyrylǵan balalar bólshek saýdasy men onlaın market-pleıstarda saýdaǵa qoıylady.
