Qazaqstandyq mergender Kýveıttegi halyqaralyq týrnırde 2 altyn, 2 kúmis, 2 qola júlde jeńip aldy
ALMATY. 13 naýryz. QazAqparat - Qazaqstandyq mergender Kýveıtten oljaly qaıtty. Onda oq atýdan 28 aqpan men 10 naýryz aralyǵynda halyqaralyq týrnır ótken bolatyn. 39 eldiń sportshylary qatysqan bul baıraqty básekede el namysyn qorǵaǵan 14 sportshynyń 10-y «Dınamo» sport qoǵamynyń ókilderi boldy.
Olardyń arasynan pnevmatıkalyq tapanshadan oq atýda Rashıd ıÝnýsmetov, MV-9 jattyǵýy boıynsha Aleksandra Malınovskaıa altynnan alqa taqty. Aleksandra sondaı-aq kelesi bir jattyǵý boıynsha Aleksandr Ermakovpen birge el qorjynyna túsken kúmis medaldiń de ıegeri atandy. Al qola júldeni Záýresh Baıbosynova men Vladımır Isachenko saldy.
«Ótken jyly tuńǵysh ret ótken bul týrnırden bizdiń sportshylar 4 medalmen oralǵan edi. Bıylǵy jarysta sportshylarymyz óz kórsetkishin odan jaqsartyp, bir qadam alǵa jyljydy. Bizde ashyq aspan astynda atý alańdary joqtyǵyna qaramastan sportshylarymyz aýa raıynyń qolaısyzdyǵyna qaramastan el namysyn abyroımen qorǵap shyqty», - deıdi aǵa jattyqtyrýshy Konstantın Malınovskıı. Onyń aıtýynsha, Halyqaralyq oq atý federatsııasy bıyldan bastap jarystarǵa jańa erejeler men tártipter engizgen bolatyn. Onda qarýdy tekserý jaǵy qataıtylyp, aqtyq jattyǵý bólimin ótkizýdiń bolmysy ózgertilip otyr. Buryn aqtyń synda sportshylardyń oǵan deıin jınaǵan upaılary esepke alynsa, endi aqtyq synda kim kóp upaı jınasa, sol jeńimpaz atalady», -deıdi aǵa jattyqtyrýshy. «Dınamolyq» bilikti bapkerdiń sózine qaraǵanda, sportshylardy alda endi Azııa chempıonaty men Búkilálemdik ýnıversıada oıyndary kútip tur. Al alǵashqy olımpıadalyq joldamalar sarapqa salynatyn Álem chempıonaty 2014 jyly ótpek.
