Qazaqstandyq mergen nysana kózdeýden álem chempıony atandy
ASTANA. QazAqparat – Qazaqstandyq Zýhra Ernazarova Ázerbaıjan astanasy Bakýde nysana kózdeýden ótip jatqan 53-shi álem chempıonatynda jeńimpaz atandy, dep habarlaıdy QazAqparat tilshisi.
Sportty damytý dırektsııasynyń baspasóz qyzmetinen málim etkenindeı, áıelder arasynda 10 metrden jyljymaly nysana kózdeýden fınalǵa qos qazaqstandyq Zýhra Ernazarova men Aleksandra Sádýaqasova shyǵyp, bas júldeni ózara sarapqa saldy.
Tartysty ótken sońǵy básekede Zýhra otandasy Aleksandradan 6:3 esebimen basym túsip, altyn júldeni jeńip aldy. A. Sádýaqasovaǵa kúmis, ýkraınalyq Galına Avramenkoǵa qola medal buıyrdy.
Qazirgi tańda Qazaqstan qorjynynda úsh júlde bar. Birneshe kún buryn stend atýdyń trap baǵdarlamasynda Marııa Dmıtrıenko men Danııl Pochıvalov mıkste úzdik úshtikke ilikken edi.
Bakýdegi álem birinshiligi 1 qyrkúıekte márege jetedi.
