Qazaqstandyq mergen Islam Sátbaev Parıj Olımpıadasyna lıtsenzııa aldy
ASTANA. QazAqparat – Qazaqstan quramasy Ázerbaıjan astanasy Bakýde ótip jatqan stend atýdan 53-shi lıtsenzııalyq álem chempıonatyna qatysyp jatyr, dep habarlaıdy QazAqparat.
Mádenıet jáne sport mınıstrligi erler arasynda «10 m pnevmatıkalyq myltyqtan atý» jattyǵýynyń fınalynda otandasymyz Islam Sátbaev 4-shi oryn alyp, Olımpıada lıtsenzııasyna ıe bolǵanyn habarlady. Atalǵan jattyǵý boıynsha Parıj Olımpıadasyna barlyǵy 4 joldama beriledi. Sonymen qatar almatylyq mergen 632,7 upaı jınap, Qazaqstan rekordyn ornatty.
Mádenıet jáne sport mınıstri Ashat Oralov Islamdy tabysty óner kórsetýimen quttyqtady.
«Islam Sátbaevty jáne Qazaqstan qurama komandasyn birinshi olımpıadalyq lıtsenzııany jeńip alýymen quttyqtaımyn! Bul sportshylarymyz úshin Parıjdegi oıyndarǵa sońǵy joldama emes ekenine senimdimin. Bıyl mergenderimiz iri halyqaralyq birinshilikterde keremet nátıje kórsetýde. Mysaly, stend atýdan Qazaqstan quramasy Almatyda ótken Álem kýbogynyń medaldik esebinde úzdik atandy. Quramanyń ózge de músheleriniń joǵary nátıje kórsetýine tilektespin», - dedi Ashat Oralov.
Oq pen stend atýdan lıtsenzııalyq álem chempıonaty 1 qyrkúıekke deıin jalǵasady.
Birinshilikke álemniń 100 elinen 1 500-den astam sportshy qatysyp jatyr. Qazaqstan namysyn elimizdiń eń myqty 50 mergeni qorǵaıdy.
