Qazaqstandyq «Mergen» fılmi Kanadada ótetin festıvalge qatysady

NUR-SULTAN. Rejısser-debıýtant Raıymbek Áljanovtyń «Mergen» atty qysqametrajdy fılmi janrlyq kınolarǵa arnalǵan álemdegi bedeldi festıvalderdiń biri – halyqaralyq Fantasia kınofestıvaline qatysady, dep habarlaıdy QazAqparat.

Atalǵan kıno baıqaýy 2-25 tamyz aralyǵynda Kanadada ótedi. Kınotýyndyny QR Mádenıet jáne sport mınıstrligi tapsyrysy boıynsha «Ulttyq kınony qoldaý ortalyǵy» KEAQ qoldaýymen Sh.Aımanov atyndaǵy «Qazaqfılm» AQ túsirgen.

«Mergen» fılminiń alǵashqy kórsetilimi Fantasia kınofestıvali sheńberinde ótetinine óte qýanyshytymyz. Montajdaý jumystary aıaqtala salysymen fılmdi osy baıqaýǵa jiberdik. Osy oraıda maǵan qoldaý bildirip, fılmniń shyǵýyna atsalysqan barlyq túsirý tobyna erekshe alǵysymdy bildirgim keledi, - dedi rejısser Raıymbek Áljanov.

Fılmniń oqıǵasy XVII ǵasyrdaǵy Uly daladaǵy soǵys kezinde órbıdi.

Atalǵan fılmde jas ta bolsa, qolyna qarý alyp, otbasyn qoǵaýǵa bel býǵan Mergen esimdi balanyń ómiri baıandalady.

Fılmdegi basty róldi Álıhan Ábı somdaıdy. Sondaı-aq bul kartınaǵa Raıhan Aıtqojanova jáne Dýlyǵa Aqmolda syndy tanymal akterler túsken.

Fılmniń túsirý jumystary Almaty oblysyndaǵy Túrgen shatqalynda jáne «Qazaqfılm» pavılondarynda júrgizildi.

Osymen 25-shi ret ótkizilip jatqan Fantasia halyqaralyq kınofestıvali - álemdegi janrlyq fılmderge arnalǵan birden bir baıqaý.

Atalǵan kınofestıval sheńberinde Kventın Tarantıno túsirgen «Besslavnye ýblıýdkı», Tımýr Bekmambetovtyń «Nochnoı dozor», sondaı-aq «Pýnkt naznachenııa» franshızasynyń bir bóliminiń tusaýy kesilgen bolatyn.

Aıta ketsek, festıvaldiń Radical Spirit atty qysqametrajdy fılmderge arnalǵan baıqaýyna qazaqstandyq kınotýyndymen birge Ulybrıtanııa, Meksıka, Avstralııa, AQSh, Qytaı jáne Ońtústik Koreıa týyndylary qatysady.