Qazaqstandyq «Meniń kúnáli perishtem» atty fılmdi tanymal frantsýzdyq maman Nıkolas Trembasevıch montajdaýda
ALMATY. 8 aqpan. QazAqparat /Názıra Eleýhan/ - Búgin Almatyda Sháken Aımanov atyndaǵy "Qazaqfılm" kınostýdııasynda rejısser Talǵat Temenovtyń «Meniń kúnáli perishtem» («Jeńý») atty fılminiń montajdyq jumystarynyń aıaqtalýyna oraı baspasóz máslıhaty bolyp ótti.
Onda atalmysh fılmniń rejısseri Talǵat Temenov: "Nıkolas Trembasevıch fılmderdi mantajdaý boıynsha halyqaralyq deńgeıdegi maman. «Qazaqfılm» sondyqtan ony bul jobaǵa arnaıy shaqyrdy. Ol Lıýk Besson, Jerar Kravchık syndy kıno sheberlerinen kóp tájirıbe jınaǵan. Tipti ony Lıýk Bessonnyń oń qoly dep aıtsa da bolady. Nıkolas Penelopa Krýstyń qatysýymen ótken "Fan-fan tıýlpan" fılmin, "ıAmakası", "Taksı-2", «Vasabı», «Tasymaldaýshy» jáne taǵy da basqa álemge tanymal fılmderdi montajdaǵan. Ol Eýropa men Amerıkada óte tanymal", - dedi. Onyń aıtýynsha qazir mantajdaý jumystary aıaqtalyp qalǵan.
"Shaqyrtý alǵanda birden kelistim. Óıtkeni men shetelde Qazaqstan týraly jıi estıtinmin. Óz kózimmen kórip qaıta úshin de qyzyq boldy. Bir sózben aıtqanda, bul elmen tanysqym keldi. Almatynyń eń kórikti jerlerinde boldym. Maǵan qalalaryńyz qatty unady. Aldaǵy ýaqytta maǵan usynystar túsip jatsa, shyn nıetpen qazaqstandyq rejısserlermen jumys isteýge daıynmyn", - dedi Qazaqstanǵa tuńǵysh ret kelgen Nıkolas Trambasevıch.
Onyń aıtýynsha, fılm romantıkaǵa toly, óte áýezdi. "Fılmniń oqıǵa jelisi óte qyzyqty. Kelgen kezde materıaldar negizinen montajdalǵan bolatyn. Men tek óńdep, aıaqtap, jóndedim. Osynyń barlyǵyna tórt jarym aptadaı ýaqyt ketti. Montajdaýda buǵan deıin jasaǵan jumystarymnan eshqandaı ózgeshelik joq. Ekshn fılm bolmaǵandyqtan montajdaý ońaıǵa soqty. Fılm tolyǵymen bir aptadan soń daıyn bolady", - dedi ol.
Máslıhatta ol osy jumystarymen qatar, josparlarymen de bólisti. "Rejısser Pol Mak Gıgannyń «Besinshi ólshem» dep atalatyn fılmi - meniń sońǵy aıaqtaǵan jumysym. Ol fılmdi mantajdaýǵa 10 aıdaı ýaqyt ketti. Aldaǵy ýaqytta Amerıka men Parıjde basqa da fılmderdi montajdaıtyn bolamyn», - dedi ol.
Atalmysh fılmniń qoıýshy-rejısseri Talǵat Temenovtyń aıtýynsha, fılmniń tusaýkeseri bıylǵy jyldyń kókteminde ótpek.
Fılm - romantıkalyq mahabbat tarıhy jaıynda. Kınonyń uzaqtyǵy - 90 mınýt. Janry - jastar kınosy. Fılmde Parıjge ketkisi keletin, óıtkeni onda baı jigiti bar jas qyz-talantty ánshi týraly baıandalady. Ónerimen Parıjdi baǵyndyrmaq bolǵan ánshi qyzǵa baı jigit kómektesedi. Ańsaǵan armanyna jeter ýaqytta, aıaq astynan ony qarapaıym bir jigit unatyp qalady. Janr zańdylyqtary boıynsha mahabbat úshtaǵany qalyptasady. Al, qyz qarapaıym jigitpen qala ma, joq pa?... Ony kórermen osy fılm arqyly bile alatyn bolady.
