Qazaqstandyq memlekettik qyzmet úlgisi álemdegi eń ozyq 30 úlgige jaqyndady - Á. Báımenov
ASTANA. 26 naýryz. QazAqparat -Qazaqstandyq memlekettik qyzmet úlgisi álemdegi eń ozyq 30 memlekettik qyzmet úlgisine jaqyndady.
Búgin Astanada ótken QR Prezıdenti janyndaǵy Ortalyq kommýnıkatsııalar qyzmetiniń dástúrli aptalyq brıfıngisinde Memlekettik qyzmet isteri agenttiginiń tóraǵasy Álıhan Báımenov osylaı málim etti.
«Halyqaralyq sarapshylardyń joǵary baǵasyn alǵan Qazaqstandaǵy memlekettik qyzmet modeli óz deńgeıinde qalyptasty. Al qazirgi jańa ózgeristermen qazaqstandyq memlekettik qyzmet úlgisi álemdegi eń ozyq 30 memlekettik qyzmet úlgisine jaqyndap otyr. Buny sol 30 eldiń ókilderinen turatyn Ekonomıkalyq yntymaqtastyq jáne damý uıymynyń sarapshylary da moıyndap otyr. Osyny eskere kele, bir jyl buryn Elbasy N. Nazarbaev Astanada Memlekettik qyzmet salasyndaǵy ozyq úlgini taratatyn BUU men Memlekettik qyzmet isteri agenttiginiń Óńirlik hab qurý týraly bastamasyn qoldaǵan edi», - dedi Á. Báımenov.
Onyń sózine qaraǵanda, Óńirlik habqa qatysty aýqymdy jumystar júrgizilip, álemniń birqatar bedeldi memleketterimen kelisimsharttar jasalǵan.
«Jalpy búgingi kúnniń ózinde memlekettik qyzmet salasynyń qazaqstandyq úlgisi aımaqtaǵy zor qyzyǵýshylyqqa ıe», - deıdi agenttik tóraǵasy.
