Qazaqstandyq memqyzmetshilerdiń dórekiligi basym

ASTANA. QazAqparat - Qazaqstannyń memlekettik qyzmetshileriniń ádepsizdik tanytýynda dórekilik basym. Bul týraly QR Memlekettik qyzmet isteri jáne jemqorlyqqa qarsy is-qımyl agenttigi Memlekettik qyzmet salasyndaǵy baqylaý departamentiniń dırektory Ravıl Tólebaev aıtty, dep habarlaıdy QazAqparat.

«Áriptester arasyndaǵy dórekilik ádepti buzýda birinshi orynda tur. Máselen, 670-ten astam ádep buzýdyń ishinde dórekilik pen ádepsiz qylyq 105 ret oryn alǵan», - dedi ol QR Memlekettik qyzmet isteri jáne sybaılas jemqorlyqqa qarsy is-qımyl agenttigi Astana qalasy ákimdigimen birlesip uıymdastyrǵan semınar barysynda.

Degenmen, onyń aıtýynsha, 2015 jyly Ádep jónindegi keńes otyrysyna shyǵarylǵan isterdiń 75 paıyzy tártiptik máselege qatysty bolsa, al 2017 jyly olardyń sany 50 paıyzǵa jýyq qysqarǵan.

«Keńesterdiń quramy da  aıtarlyqtaı ózgeriske ushyrady. Endigi kezekte keńes músheleriniń úshten ekisin Óńirlik BAQ-tardyń bas redaktorlary, ÚEU ókilderi, ǵylymı-pedagogıkalyq qoǵamdastyq ókilderi jáne máslıhat depýtattary quraıdy. Buǵan qosa, Ádep jónindegi keńes músheleri derbes jumys isteı bastady. Olar aldyn alý sharalaryna belsene qatysyp, azamattardy qabyldaıdy. Aıta keterligi, olardyń Ádep jónindegi keńes jumysyna qatysty aqparattary keńeıip, memlekettik qyzmetshilerge qatysty senimderi arta túskendigin aıtqan jón. Oǵan «Bilim» ǵylymı-zertteý ortalyǵynyń memlekettik qyzmetshilerdiń ádep deńgeıin anyqtaýǵa baǵyttalǵan áleýmettik zertteýleriniń nátıjesi dálel bola alady», - dedi Ravıl Tólebaev.

Onyń dereginshe, atalǵan zertteý nátıjesine sáıkes, saýalnamaǵa qatysqandardyń 73 paıyzy Ádep jónindegi keńestiń sheshimderine senetindikterin bildirgen. Pavlodar, Mańǵystaý, Shyǵys Qazaqstan oblystarynda bul kórsetkish 90 paıyzdan asyp jyǵylady. Al elordada atalǵan keńeske senim artatyn memlekettik qyzmetshilerdiń úlesi 65 paıyzǵa jetip otyr.