Qazaqstandyq medıtsınalyq uıym Qyrǵyzstannyń 2 ortalyǵymen memorandýmǵa qol qoıdy
NUR-SULTAN. QazAqparat – Pedıatrııa jáne balalar hırýrgııasy ǵylymı ortalyǵy Qyrǵyz Respýblıkasynyń Ana men balany qorǵaý, Onkologııa jáne gematologııa ulttyq ortalyqtarymen yntymaqtastyq týraly memorandýmǵa qol qoıdy, dep habarlaıdy QazAqparat.
«Pedıatrııa jáne balalar hırýrgııasy ǵylymı ortalyǵy» baspasóz qyzmetiniń málimetinshe, memorandým aıasynda eki el arasynda medıtsınalyq kómek kórsetýdi arttyrý, medıtsınalyq týrızmdi damytý, medıtsına qyzmetkerler men dárigerlerdiń biliktilikterin arttyrý jáne basqa da salalar boıynsha ekijaqty áriptestik ornatylmaq. Shara barysynda sonymen qatar, Qazaqstan men Qyrǵyzstan medıtsınalyq uıymdary arasynda 10 memorandýmǵa qol qoıyldy.
Aıta keteıik, búgin Qyrǵyz Respýblıkasynda Qazaqstannyń medıtsına kúnderi bastaldy. Eki kúndik sharaǵa elimizdiń Densaýlyq saqtaý mınıstri Eljan Birtanov bastaǵan 100-den astam delegat qatysýda.
Іs-shara QR Prezıdenti Qasym-Jomart Toqaevtyń Qyrǵyz Respýblıkasyna resmı sapary qarsańynda ótýde.
Qyrǵyzstandaǵy qazaqstandyq medıtsına kúnderi – bul Qazaqstan men Qyrǵyzstan densaýlyq saqtaý júıeleri arasyndaǵy yntymaqtastyqty kúsheıtýge, medıtsınalyq uıymdar arasyndaǵy ózara is-qımyldy keńeıtýge, eki eldiń azamattaryna medıtsınalyq kómek kórsetýdiń qoljetimdiligi men sapasyn qamtamasyz etý jolynda tájirıbe men bilimmen, ınnovatsııalar men tehnologııalarmen almasýǵa baǵyttalǵan is-shara.
Sapar barysynda qazaqstandyq mamandar medıtsınalyq uıymdarda azamattarǵa tegin keńes berýdi uıymdastyrýdy josparlaýda.
Sondaı-aq, is-shara aıasynda Qazaqstannyń ozyq medıtsınalyq uıymdarynyń qatysýymen medıtsınalyq kórme ótedi.
