Qazaqstandyq medıa salasynda sabaq berýshilerdiń tájirıbesi shyńdaldy
ALMATY. Tamyzdyń 30-y. QazAqparat /Erbol Azanbek/ -Almaty mańyndaǵy Qapshaǵaı qalasynda «Medıa salasynda sabaq berýdiń zamanaýı tásilderi» atty semınar aıaqtaldy,
dep habarlaıdy QazAqparat.
Esterińizge sala keteıik «MediaNet» halyqaralyq jýrnalıstıka ortalyǵynyń uıymdastyrýymen ótken semınar tamyzdyń 27-si kúni bastalǵan bolatyn. Sharaǵa ortalyq janynda jumys isteıtin medıa mektepte sabaq berýshi 11 medıa jattyqtyrýshy qatysty. Bulardyń qatarynda «QazAqparat» agenttigi, «Bıznes ı vlast», «Izvestııa Qazaqstan», «Respýblıka», «Fokýs» basylymdary, KTK telearnasy, 31-shi arna, «Kar-Tel» JShS-i, EQYU - nyń Ortalyq Azııa boıynsha quqyq máseleleri boıynsha ókildiginiń ókilderi bar. Qatysýshylarǵa Qazaqstannyń Medıa alıansynyń tóraǵasy Ádil Jalılov, Freedom House uıymynyń atqarýshy dırektory Vıacheslav Abramov, «MediaNet» halyqaralyq jýrnalıstıka ortalyǵynyń dırektory Igor Brattsev zamanaýı medıa salasynda sabaq berý, trenıngter ótkizý tásilderi týraly dáris ótkizdi. Ádil Jalılovtyń aıtýynsha, trenıngtiń maqsaty medıa salasynda dáris berýshilerdiń shoǵyryn qalyptastyrý. «Qazirgi tańda «MediaNet» elimizdegi jýrnalısterge arnalǵan kýrstar ótkizetin jalǵyz mektep. Bunda joǵary oqý oryndaryn aıaqtaǵan soń alty aılyq kýrstarda bilimin jetildirý, BAQ salasynda jumys isteýge tájirıbe júzinde daıyndyq jasaýǵa múmkindik beredi. Bul baǵytta tájirıbeli BAQ-tar, qoǵamdyq uıymdardyń ókilderi tartylyp, jattyqtyrýshy retinde óz tájirıbelerimen bólisedi. Ótken semınar barysynda osy jattyqtyrýshylarǵa sabaq berý tásilderi, trenıngti tartymdy ótkizý, óz tájirıbelerin úıretý joldary túsindirildi», deıdi Ádil Jálılov.
QazAqparat anyqtamasy: «MediaNet» halyqaralyq jýrnalıstıka ortalyǵy 2004 jyly qazaqstandyq jýrnalısterdiń bastamasymen qurylǵan bolatyn. Negizgi baǵyty qazaqstandyq jýrnalıstıkanyń damýyna úles qosý, mamandar daıyndaý, jýrnalıst mamandardy biriktirý. Bul baǵytta ortalyq janynan 2005 jyly medıa mektep ashylǵan. Qazirgi kezge deıin mektep 200-den astam BAQ jáne PR mamandaryn oqytý jáne qaıta daıyndaýdy júzege asyrǵan. Qazirgi tańda Qazaqstandaǵy jýrnalıst jáne PR mamandaryn qysqa merizimde daıyndaýǵa arnalǵan jalǵyz mektep bolyp otyr.
