Qazaqstandyq metsenattar týǵan jerlerine 270 mlrd teńgege kómek kórsetti
«Osy rette «Rýhanı jańǵyrý« baǵdarlamasynyń «Týǵan jer« jobasyn, onyń metsenattyqty damytý baǵyty týraly arnaıy atap ótkim keledi. Ózderińiz bilesizder, 2018 jyldan bastap mınıstrlik «Jomart júrek« syılyǵyn taǵaıyndap, jyl saıyn qaıyrymdylyqqa jany jaqyn azamattarǵa usynyp keledi. Olardyń ishinde árıne, týǵan ólkesine erekshe úles qosyp júrgen tulǵalardyń orny bólek. Baǵdarlamany iske asyrýdyń 3 jylynda osyndaı 12 myń metsenat azamattarymyzdyń demeýshiligimen 270 mlrd teńgeniń jumysy atqaryldy», - dedi vıtse-mınıstr Ortalyq kommýnıkatsııalar qyzmetindegi baspasóz máslıhatynda.
Onyń aıtýynsha, metsenattar atalǵan qarajatqa 2 600-den astam túrli áleýmettik mańyzy bar rýhanı nysan salyp, 2 142 nysandy qaıta jóndeýden ótkizgen.
«Bıylǵy qıyndyqtarǵa qaramastan 2 131 demeýshi azamattyń arqasynda elimizdiń ár aımaǵynda 228 nysan salyndy. Onyń ishinde 2 mektep, 2 balabaqsha, 19 mádenıet nysany, 36 sport alańy, 31 balalar alańy jáne basqalary bar. Árıne, bul jumys aldaǵy ýaqytta da óz jalǵasyn tabady degen úmittemiz. Ol úshin mınıstrlik tarapynan da, jergilikti bılik tarapynan da qajetti jaǵdaı jasalatyn bolady», - dedi Bolat Tilepov.
