«Qazaqstandyq mazmun - el múddesi» - respýblıkalyq basylymdarǵa sholý

***

«Qazaqstandyq mazmun - el múddesi». «Egemen Qazaqstan» gazetiniń senbilik nómirinde osy taqyryppen jaryq kórgen maqala Úkimet basshysy Kárim Másimovtiń Atyraý oblysyndaǵy jumys saparyna arnalǵan. Basylymnyń jazýynsha, Premer-Mınıstr mektep túlekteriniń «Aqjelken-2010» sharasyna qatysyp, UBT qorytyndysy boıynsha 100 baldan joǵary jınap, mektepti úzdik bitirgen túlektermen kezdesken. Osydan keıin oblystaǵy birqatar ónerkásip nysandaryn aralap, olardyń jumys barysymen jan-jaqty tanysqan. Úkimet basshysynyń jumys sapary jaıynda basylymnyń senbilik nómirinen egjeı-tegjeıli oqı alasyzdar.

«Qazaqstan musylmandary dinı basqarmasy men Orta Azııa múftıler keńesiniń tóraǵasy, sheıh Ábsattar qajy Derbisáli haziret Frantsııanyń Qazaqstandaǵy Tótenshe jáne Ókiletti Elshisi Jan-Sharl Bertone myrzany onyń ótinishi boıynsha qabyldady. Ortaq áńgimege eki eldiń dinı-rýhanı máseleleri arqaý boldy», dep jazady «Egemen Qazaqstan» gazeti. Elshi kóp ult pen ulysty Qazaqstan halyqtarynyń yntymaq pen birlikte ómir súrip jatqanyn, sondaı-aq Qazaq eliniń álemde beıbitshilik súıgish jáne dinderaralyq tózimdilik ordasyna aınalǵanyn, jahanda oǵan tánti bolmaǵan elder az ekenin tilge tıek etip, jurtymyzdyń ustanymyna qyzyǵatynyn jáne oǵan jetýdiń joldary, tájirıbesin bilgisi keletinin, sony Qazaqstan dinbasynan suraý nıetimen kelgenin jetkizgen. Sheıh Ábsattar qajy Derbisáli hazirettiń elshige bergen jaýabyn oqyǵyńyz kelse, basylymnyń búgingi nómirine nazar aýdaryńyz.

***

«EQYU Іs basyndaǵy tóraǵasy, QR Memlekettik hatshysy - Syrtqy ister mınıstri Qanat Saýdabaevtyń Germanııa Federatıvtik Respýbılkasynyń vıtse-kantsleri - Syrtqy ister mınıstri Gıdo Vestervellemen telefon arqyly áńgimesi boldy», dep jazady «Aıqyn» gazeti «Birlesken qımyl qajet» degen maqalasynda. Basylymnyń atap ótýinshe, taraptar Qyrǵyzstannyń ońtústiginde bolyp jatqan jaǵdaılardy jáne EQYU aıasynda sol jaılardy ońaltý máselesi boıynsha Ýaqytsha úkimetke kórsetilip otyrǵan sharalardy talqylaǵan. Sonymen qatar eki eldiń syrty saıası vedomstvo basshylary shildeniń 16-17-inde Almatyda ótetin EQYU Syrty ister mınıstrleriniń beıresmı keńesine daıyndyq barysyn qozǵaǵan.

«Aıqyn» gazetiniń dástúrli «Aq sóıle!» aıdarynyń senbilik qonaǵy - A.Baıtursynuly atyndaǵy Til bilimi ınstıtýty tilder kafedrasynyń meńgerýshisi Ǵalymjan Ermekbaımen aradaǵy suhbat «Til: Barlyq jol ǵylymǵa aparady» degen taqyryppen basylǵan. Basylym tilshisiniń barlyq saýaldaryna tuşymdy jaýap bergen ol «jańa aqparat túbinde jańa taýar nemese qyzmet týdyrady. Dál osylaısha til ǵylymynda áýeli tildiń ózin jan-jaqty zertteý qajet, ıaǵnı onyń egjeı-tegjeıli zańdylyqtary jasalýǵa tıis. Olar tildiń qyzmet etý múmkindigin keńeıtýge, sol tildegi aqparatty kóbeıtýge, birte-birte damyǵan tildiń paıda bolýyna alyp keledi», depti.

***

«Astana qalasynyń ákimi Imanǵalı Tasmaǵambetov pen Densaýlyq saqtaý mınıstri Jaqsylyq Dosqalıev elordalyq medıtsına salasynyń qyzmetkerlerin kásibı merekelerimen quttyqtady», dep jazady «Astana aqshamy» gazeti. Basylymnyń atap ótýinshe elordadaǵy 34 medıtsınalyq mekemede isteıtin 5300 adam kún saıyn 16 myńnan astam turǵynǵa qyzmet kórsetedi eken. Sońǵy eki jyldyń ishinde qalada zamanaýı qural-jabdyqtarmen jaraqtandyrylǵan 14 medıtsına nysany boı kóterilip, taǵy 8 nysannyń qurylystary júrgizilýde. Aǵymdaǵy densaýlyq salasyna qala bıýdjetinen 12 mıllıard qarjy bólinse, 2012 jyly ol 14 mlrd. teńgege deıin kóterilmek.

Astana kúni merekesi qarsańynda velosıped jarysynan ótetin «Astana kýbogy» dástúrli halyqaralyq jarysy aǵymdaǵy jyly sol jaǵalaýaǵy Táýelsizdik jáne Dostyq kóshelerindegi buqaralyq velojaryspen bastalady. «Astana aqshamy» gazetiniń atap ótýinshe, atalǵan sharaǵa «Astana» veloklýbynyń maıtalman shabandozdary Aleksandr Vınokýrov pen Alberto Kontador qurmetti qonaq retinde qatysady.

***

Fýtboldan 2010 jylǵy álem chempıonaty tórtkúl dúnıeniń nazaryn ózine aýdaryp otyr. Qazaqstan jankúıerleri de HІH álem chempıonatyn qalt jibermeı tamashalaýda. Osyǵan oraı «Alash aınasy» gazetinde jaryq kórgen maqalada elimizdiń orystildi kommentatorlarynyń keıbir sózderine qynjylys bildirilgen. «Keıbir sózderi júregimizge biz qadap alǵandaı selt etkizedi. Evgenıı Akmanov degen kommentator Japonııa men Nıgerııa oınasa boldy, Keısýke Hondany jáne Chıdı Odıany «ıgrok stolıchnogo TsSKA» deıdi. TsSKA - Reseı astanasy Máskeýdiń komandasy. Sonda Qazaqstannyń astanasy Máskeý me?! Bir emes, birneshe ret osylaı dedi. Munysy nesi?..», dep jazǵan basylym jalpy, osyndaı sport dodalaryn orys tilinde júrgizýdiń qajeti bar ma? Sport dodalarynan beriletin reportajdar, onyń ishinde fýtbol tek qazaq tilinde júrgizilse, bul memlekettik tilimizdi nasıhattaýdyń, úıretýdiń tamasha joly bolar edi degen oılaryn alǵa tartady. Gazet tilshisiniń osy tóńirektegi oı-pikirleri «Bizdiń astanamyz Máskeý me?» atty maqalada jan-jaqty negizdelgen.

«Semeıdegi saýyqtyrý mekemesiniń mamandary temir torda otyryp, kúızeliske ushyraǵandardy qazaq kúıiniń qudiretimen emdeýdi uıǵardy. «Kúımen jan jarany emdeý» atty mundaı jańa ádistemeni túrmede jazasyn ótep jatqandardyń biri usynypty. Al oǵan mundaı oı telearnalardyń birinen kórsetilgen «Mýzykanyń adamǵa berer áseri» degen habardan keıin kelipti», dep jazady «Alash aınasy» gazeti. Bul jóninde keńirek semeılik avtordyń «Qapasta qamyqqandardy Qurmanǵazy qutqarady» atty maqalasynan bilýge bolady.

Turǵyndar sany 50-ge jetpeıtin aýyldardy qarjylandyrý ekonomıkalyq turǵydan tıimdi bolmaǵandyqtan, sońǵy kezderi aımaqty damytý baǵdarlamasy aıasynda olardy biriktirý jumystary júrgizilýde. Kim-kimge de kindik qany tamǵan aýylynyń joıylyp ketkeni ońaı emes. Osy oraıda, «Alash aınasy» «Shaǵyn aýyldardy saqtap qalý úshin eldimekender statýsyn anyqtaýdy qaıta qaraý kerek pe?» degen saýaldy tarazyǵa tartyp kórgen eken. Bul jóninde óz kózqarastaryn bildirgen qoǵam qaıratkeri Baltash Tursynbaev pen Senat depýtaty Baqbergen Dospanbetovtiń pikirlerin «Oı-kókpar» aıdarynan oqı alasyzdar.

***

«Aǵymdaǵy jyly 75 jyldyq mereıtoıyn atap ótetin Almatynyń memlekettik qýyrshaq teatry Pragada ótken 14-shi dúnıejúzilik qýyrshaq óneri festıvalinde «Qańbaq shal» atty qazaq ertegisimen bas júldeni jeńip aldy», dep jazady «Kazahstanskaıa pravda» gazeti. Basylymnyń atap ótýinshe, bıylǵa festıvalge qatysýǵa 273 ótinish túsip, irikteý komıssııa 44 eldiń shyǵarmashylyq toptaryn tańdap alǵan. Osylaısha 28 memleketten kelgen 38 teatr ujymy baıqaýǵa qatysý múmkindigine ıe bolǵan. Nátıjesinde qazylar alqasy «Qańbaq shal» qoıylymyn «Úzdik teatr dekoratsııasy jáne qýyrshaq dızaıny» atalymy boıynsha bas júldege laıyqty dep tapqan.

Bul qýanyshty habar «Egemen Qazaqstan» gazetiniń de nazarynan tys qalmaǵan.

Qyrǵyzstannyń ýaqytsha úkimeti Qazaqstanǵa aǵyp keletin ózendi bekitip, qazaqstandyqtarǵa tıesili Ystyqkól pantsıonattaryn ult menshigine ótkizýdi josparlap otyr. Osyǵan oraı «Lıter» gazeti Májilis depýtaty Vladımır Nehoroshovqa, Táýekelderdi baǵalaý tobynyń dırektory Dosym Sátpaevqa jáne saıasattanýshy Aıdos Sarymǵa «Ondaı ýaqytsha úkimetke kómektesý qajet pe?» degen saýal qoıǵan. Esimi elge belgili atalǵan azamattardyń jaýaptaryn oqyǵyńyz kelse «Lıter» basylymnyń senbilik sanyna nazar salyńyz.